賓架H嘅秘書去蘭桂坊剪髮，六點幾放工就去，聽講要九點幾先至完工，第二朝見到，好似只係剪短幾吋啫喎，剪髮點解要搞咁耐呢？馬主H唔係女人，唔明白。佢自己飛髮，就摸上去龍子行六樓嗰度有間飛髮舖，係龍子行最耐嘅租戶，已經二十八年，剪髮剃鬚只需一百大元，比起蘭桂坊收女人錢，動輒過千蚊，相差極遠。
賓架H問理髮老師傅：「好似你呢類嘅飛髮舖，似乎執完一間又一間，好難搵咯。」老師傅話：「我哋由舊告羅士打大廈做到𠵱家，已經幾十年，以前董伯都係我哋常客嚟㗎；不過現在冇乜細路肯學飛髮，只肯學做髮型師，加上舖租貴，我哋啲舊式理髮舖，梗係買少見少啦。」
傳聞龍子行拆建在即，啲租客租約到今年十一月就完，租客紛紛覓地遷移，睇嚟老師傅如果搵唔到適合嘅地方搬，佢啲熟客（幾乎全部打電話預約時間）以後要喺中環嘅中心地帶剪髮都幾難。理髮舖後有一間「碧利菲傭」，好多年前係何文滙（現中大教務長）創立嘅，後來送咗畀啲開國功臣，經營多年，𠵱家貼出告示：停止營業，業務交由奇峯菲傭跟進。介紹菲傭嘅生意，經二十幾年發展後，已過咗黃金時期，賺錢並不容易。賓架H從龍子行走出嚟，心生感慨，龍子行係佢出道時嘅「名牌豪裝」，現只餘殘廈，連菲傭介紹所都停業，時代變矣。