相信大家都知道，現今汽車嘅安全設備，都能夠為車上乘客帶來充份嘅保護；但對胎兒嘅安全，就好似未有作出詳細嘅研究，甚至有關胎兒牽涉在交通意外之內嘅資料亦好少。而向來以安全為重嘅富豪汽車，最近就特別研製出全球首個電腦孕婦撞擊模型，從而希望進一部加強由佢哋所生產嘅汽車，對孕婦及胎兒嘅保護性。
懷孕後期嘅胎兒喺意外時會較危險，而呢個電腦孕婦撞擊模型，就係依據呢個時段而設計；據富豪汽車安全中心生物機械工程師CamillaPalmertz表示，呢個模型嘅最大好處，就係可依據廠方不同嘅測試要求，而改變孕婦及胎兒嘅大小，以確保每部富豪汽車，都能夠保護不同身形嘅孕婦及胎兒。而各項測試嘅目的，主要係研究當發生意外時，安全帶及氣袋對胎兒及孕婦嘅影響；電腦模型會詳細分析安全帶嘅移動方向、安全帶同氣袋對子宮、胎盤及胎兒嘅影響等等，以求設計出最能保護孕婦及胎兒安全嘅設施，另外該模型重會用作設計新安全帶及其他安全系統㖭。相信喺未來嘅日子，將有更多車廠採用類似嘅測試模型協助研製新車，以確保所有汽車都能夠為車上每位乘客，帶來充份嘅保護。