大家都知前英格蘭國腳韋斯火氣大，估唔到佢響李斯特城養老都重未識收火。李斯特城早兩日宣布韋斯響集訓時打爆隊友大衞臣嘅面頰骨，令到對方可能要長唞，𠵱家俾隊波棄用，自由轉會，大衞臣又話可能告佢，真係臨老唔過得世。
我求大俠唔知韋斯因乜事扯火，但作為老大哥，點都唔應該對後輩咁重手。韋斯已經三張四，上季因為受傷踢得十幾場波，今次因紀律問題被李斯特城棄用，真係唔知搵唔搵得番容身之所，希望呢隻老馬經一事長一智啦。
巴西國家隊教練史高拉利「大菲」突然爆料，原來佢同班國腳都唔妥比利，話球王成日亂咁批評國家隊，根本唔識波，所以當上個月由比利負責頒個世界盃畀佢哋時，其實大家唔係太高興。比利近年成日俾人笑佢貼波水皮，𠵱家連自己人都唔妥佢。
曼聯尼維利兄弟齊齊錯過上個月踢世界盃嘅機會，好失落，所以佢哋打投球好叻嘅細妹翠茜就話希望幫英格蘭響英聯邦運動會揚威，順便同兩個大佬爭番啖氣喎。
德國車神舒密加成為歷來僅第二個贏得五次世界冠軍嘅一級方程式車手，意大利各大報章都大字標題話佢係「神話」、「傳奇」，讚舒密加嘅同時，似乎都炫耀埋本土產品法拉利喎！