全世界都估到，港股昨日一定跌，恒指挫215點，已算硬淨。阿松叫大家唔使驚，唔好亂沽股票，似乎有穩定人心作用。不過，如果聽佢話而將來輸咗錢，可唔可以問政府攞番？
美金昨日在亞洲冇再瀉落去，日股大跌二百幾點後抽番上去，收市只跌十幾點，如果昨晚美股企得定，港股短線好有機會反彈多少，不過彈完之後都係再跌居多。呢個時候唔適宜博Call輪反彈，尤其是嗰批就快到期而重有溢價嘅末日Call輪。
揸咗Put輪賺緊錢嘅，短線不妨吼位沽出獲利，等恒指反彈上10300樓上，先至再做過淡友。
下次做淡揀對象，可向滙豐（005）嘅Put輪埋手。滙豐係強勢股，大市最後一跌通常由佢帶動；美股3大指數已創911後新低，滙豐911低位68.25元，未必會重見，但落番去7字頭，機會唔係冇。
若見滙豐反彈兩蚊左右，可以開始收集滙豐Put輪，對象係9366。
隻輪今年12月到期，溢價6.1%，槓桿率9.8倍，現價0.88元，可待回到0.70元左近買貨。
章盛