不少家庭都有請外傭，但礙於屋企細，好多時要外傭住貯物房，或者同少主人同房，甚或要打地鋪，實在好唔方便。最好係個外傭做完嘢去第度瞓，戶主就有番好多私人空間。𠵱家唔使愁，因為有發展商喺個住宅樓盤嘅商場提供地方畀外傭住，變相成為外傭宿舍。
長沙灣順寧道483號順景華庭，破天荒將一樓商場劃出幾千呎，提供28個床位做傭工宿舍，出租畀大廈業主，月租唔使千五蚊。大家唔好以為係好多人迫埋一齊，聽講係每個房有4張床，上格畀外傭住，下面就畀佢放私人物件。而且重設有洗手間同浴室，一啲都唔差。呢個盤負責代理黃開基測量行講，床位係先到先得。
呢個盤除咗傭工宿舍外，重搞搞其他新意思。就係每單位附送一個62立方呎嘅貯物櫃，都係設喺一樓，業主可以將啲雜物放喺貯物室，咁就住得鬆動啲，要搵嘢嘅時候又唔使行咁遠。
順景華庭係單幢樓，共176伙，單位529至616方呎，實用率有八成，明年首季入伙。發展商今個禮拜會先推16伙發售，呎價三千蚊。
工業式微，過萬方呎的工廈單位已不合時宜，相反幾百至幾千呎嘅迷你貨倉，就好好租。荃灣昌興盛工業中心招租。美聯梁志輝話，單位分布喺4、6、7、10同13樓，最細675方呎，每呎月租四個二，免租期最長兩個月。佢又講，荃灣區放租嘅貨倉，最細都要二萬呎，但係佢哋招租批單位面積細，適合做貨倉擺貨，甚至用嚟做band房！原來該類非生產租客，佔咗成個工廈租務市場兩三成，比例都唔細㗎！
樓市淡靜，交投疏落，但睇吓呢幾張相，點都唔信個市咁差。睇真啲，原來張相係深圳樓盤嘅示範單位嚟㗎！和黃上個禮拜六，喺深圳福田公開發售黃埔雅苑第三期樂悠園，吸引大批市民去睇示範單位。發展商話，首度喺深圳開售，至今賣咗62個單位，今個禮拜六又再喺深圳發售新一批單位。
上周末在深圳賣出嘅單位，八成二係當地居民，重係揀大單位為主，蘭西聽講話當地人好有「米」，試過黃埔雅苑有幢住宅，啲中高層大單位俾內地人掃晒，港客只係可以買到中低層！香港同深圳兩地參觀示範單位有三千人次，單係睇相就知深圳熱鬧過香港多多聲。
今個暑假，新盤戰場嘅氣溫睇嚟會同天氣一樣咁熱辣辣，單係睇新地每個禮拜都吹風嘅珀麗灣，就知佢哋對呢個大盤幾咁重視。
新地之所以吹咁多次風，係有心嘅！揸fit人雷霆話，食燕窩都要分開幾次食啦，怕傳媒一次過消化唔到咁話。不過，雷生噚日就放風話「風都吹到尾聲嘞」。
風停後，正本戲陸續出台，雷生話，佢哋用咗差唔多成五百萬蚊，去拍攝珀麗灣三分鐘嘅短片，成本貴過今日嘅港產片。下個禮拜一舉行嘅首映禮，每家代理行用配給制攞入場券，張「飛」分分鐘有得炒。
蘭西最近又收到均來集團小欖愛琴灣售樓書，裏面夾咗隻VCD，size比信用卡厚少少，相信係等啲有興趣買家可以從另一個角度去認識個盤，屬宣傳手法之一。
提起愛琴灣，蘭西覺得發展商認真「黑仔」，個盤做咗一大輪宣傳，包括開記者會，出席代理搞嘅飯局，但到𠵱家都唔可以公開發售。點解？因為未攞到售樓紙。均來原本諗住愛琴灣喺4月底開始收票，所以執行董事戴耀華為樓盤大造宣傳，都幾有聲有色，重好有信心咁話售樓紙一批出，5月初就會公開發售，點知到𠵱家都冇下文，搞到個盤冇乜人再提。
不過，由於個盤啲別墅售價超過五百萬元，可以豁免唔使售樓紙就可以賣，咁賣番幾件，相信可以幫補吓宣傳使費，唔係就真係苦不堪言。個盤有90個單位，48個係分層，34個複式，別墅就只有8間。
蘭西
電郵地址：