九鐵呢大半年嚟日日都有新聞，當然大部份都唔慌係好嘢，以楊啟彥喺官場咁老資歷，都差啲頂唔順，楊官梗係想搵出幕後黑手，但係談何容易？何況單單嘢都有料到，重一浪接一浪，唔怪得啲傳媒做得咁高興。直至上月政府終於拍板畀九鐵起沙田中環線，新聞先至暫時停一停。
大局已定後，楊官總算有機會唞唞氣。佢同八方講，已經定咗下個月去歐洲一個月，呢次行程為公也為私，一方面放假陪老婆，另外，都想藉今次機會到海外摸摸底；事關起條新鐵路要好多錢，唔要問政府攞地攞錢，就要舉債幾百億，要睇睇海外情況點。
呢次九鐵雖然贏了合約，但付出代價也不小，楊官頭上多了一位老頂田少，人工又減咗，當然現時薪酬水平令楊官避過㷛呔嘅檢討；因為佢嘅人工冇爆燈，反而地鐵蘇澤光就彈咗出嚟，被人話人工高。今時今日，連任總都要自動減人工，又辭埋馬會董事唔做。楊官要搵人睇住，下一個肯定輪到蘇先生，佢有冇楊官咁順攤就唔知，但係既然有先例在前，佢老哥都唔慌會走得甩。
傳真︰2623-9278
電郵︰