講完點樣旺桃花同埋催財，當然係輪到健康啦，正所謂「搵幾多食幾多冇所謂，最終都係健康最寶貴」。
黃卓玲間屋大門向東北，病位（詳情見前日刊登嘅表）就喺東南，即係大廳嘅窗口位，所以佢啲植物擺喺度特別容易死。病位亦係凶位，除咗病之外，亦容易嗌交，喺屋企嘅病位擺葫蘆就可以化解。
自身嘅健康位喺間屋中間嘅後面，即係黃卓玲嘅廁所位，擺八粒白色石頭（記得照住附圖嘅陣法擺），或者擺兩嚿好似手板咁大嘅石頭，咁樣住嘅人都會健康啲。
如果屋企嘅大門對住廁所，會容易有腎病同膀胱病，女性亦較容易有女人病。廚房對住廁所就重大件事，水火相沖，住喺間屋嘅人會打交、夫妻不和，擺放大棵植物喺廁所門口擋吓會好啲。（五之三）
口述：蘇民峰 筆錄：張止寒
攝影：馬啟然 住宅提供：黃卓玲