出名硬銷龍蝦的酒樓某個地頭的分店結業，新移民洗碗女工對記者說，丈夫失業，飲食業這一行難搵工，還要養幾個正在求學的孩子，很難過哩。女工轉過頭去，忍不住哭了。
這個新聞鏡頭叫我想起，正在放一個月長假的保安局長，月前對記者私語時說過，轉職局長前，問十來歲的女兒，媽咪退休好不好。女兒答：「你搵夠錢養我，便退休吧。」保安局長轉職，提早領取大筆退休金，局長又是薪優糧準的dreamjob，局長女兒對錢銀應有的態度，跟ball場名媛一樣，一擲千金，財來有方。有阿媽做保撐腰，局長個女不是沙頭角村長個女，肯定有運行，永遠不會步章小蕙後塵。
「搵夠錢養我」，香港未必一定得，局長哪會做不到。這番私語，間接向傳媒晒冷，暗示自己已經搵夠，養得起個女，隨時可以劈炮，不會戀棧權位。
局長得十一個，洗碗女工卻是7.7%失業大軍中的盲流，何去何從，無語問天。26萬個失業人士跟局長不是瞓埋同一張床，發夢只會諗住搵工，邊會諗到咁大，搵夠？報章報道一位失業一年的30歲女髮型師，跟母親因為經濟問題爭吵後自殺。母親認屍後拭淚說：「以後，我負擔會輕些……」「搵夠錢養我」，忽然像古墓魔咒出土，多念一遍，都叫人心寒。