郭富城（城城）噚日以「愛心之星」身份，出席將軍澳新都城商場舉行嘅「反斗奇兵嘉年華」開幕禮。城城除主持開幕儀式之外，重同近三十位小朋友大跳牛仔舞，同埋即場義賣慈善禮包為「郭富城慈善基金」籌款。
大會為答謝城城嘅支持，送咗一個美國特別版嘅胡迪公仔畀城城，城城對個公仔簡直愛不釋手，影相時抱住唔放，重搞笑到問胡迪識唔識游水。城城話：「我會將公仔放喺睡房度，然後等我返嚟。」有記者笑城城應該搵個女友，城城即耍手擰頭話𠵱家以工作為重。
早前城城喺屋企曬太陽俾人影下泳褲照，問城城會唔會唔再喺屋企游水，城城話：「點解唔敢，俾人偷影都冇辦法，搞到連屋企都冇安全感，我有時都會全裸。」
黃伊汶同二人男子組合Shine噚日喺尖沙嘴，出席一個染髮劑宣傳活動。
黃伊汶話終於問准公司，攞咗一日假，問黃伊汶會點用呢一日假？佢話：「我好想約朋友去滑水呀，我已經好耐冇滑水啦！」
問黃伊汶到時會唔會着三點式泳衣，佢話：「喺香港我一定唔會，尤其係入咗行之後，因為我覺得着三點式好尷尬，周身唔舒服，好似唔知點咁。」
莫文蔚今日會喺理工綜藝館舉行《SummerMusicParty》小型音樂會，呢個重係Karen喺香港嘅第一個小型音樂會，不過Karen話今次會同合唱團合作，所以佢唔會作大膽性感打扮，加上係喺理工場館舉行，所以只會以健康性感嚟會歌迷，一眾歌迷惟有叠埋心水聽歌。
黃凱芹喺港台節目《舊日的足跡》錄音訪問中，同主持人車淑梅暢談當年同周慧敏嘅一段情。黃凱芹話：「我哋合作過一啲節目，大家可以互補不足，無論係做節目定喺舞台上，咁多年都係我嘅最佳拍檔。」而問到佢有冇追過周慧敏時，佢話：「初初見面時都覺得佢有啲特別嘅，但僅限於此。」
亞視節目《百萬富翁》噚日幫陳啟泰補祝生日，田蕊妮都有出席。陳啟泰今個月十六號生日，佢話當日同老婆撐枱腳，老婆重整咗餐海鮮宴畀佢食。陳啟泰透露𠵱家傾緊套歌舞劇，對手會係外籍女士，而且喺呢套歌舞劇度，佢要唱英文歌，所以壓力都幾大喎。
港台DJ韋家晴其實就係無綫高層陳志雲，前晚佢事隔十五年後再幫港台主持《男人之家》節目，重請咗李司棋做嘉賓。司棋姐喺節目度公布咗個好消息，就係佢一直以為自己條大髀骨裂開咗冇得醫，但最近有新儀器可以令佢啲骨埋口，令佢不知幾咁興奮。