上周五晚美股咁跌法，加上華聯（969）同埋正中藥業（327）先後玩笨豬跳，經紀陳周末打波時同小初講，今個星期咪輕舉妄動。
其實近排好多二三線股逆市企硬，好多時都係有目的而為，例如想配股抽水之類，若搞得成收咗錢之後，重會唔會頂住股價，就非常難講。
好似做電池嘅光宇（1043）咁，市場傳佢配股集資，已經傳咗好一段時間，上周終於畀佢搞掂，以先舊後新方式配售3500萬股，每股2.15元，集資金額有成7525萬元。
經紀陳話，據聞批股一事，上周五已經搞掂，有幾個芬佬肯要晒啲貨。至於點解咁睇好隻股？佢就話唔多清楚，或者係有隻同樣做電池嘅勁嘢比亞迪就快上市，所以拿拿臨先截胡。
光宇股價企在2元樓上企咗好幾個月，其間股仔經歷多次浩劫，佢都企得好硬，但今次抽水目的已經達到，跟住嘅表現好難估。
慕容小初