「香港製造」大家聽得多，咁「觀塘製造」又係乜傢伙？原來係民建聯地區慶祝黨十周年的嘉年華會，有成幾百個街坊喺度聽唱歌、睇表演。唔怪得陳鑑林、陳婉嫻，連主席曾鈺成都齊齊嚟捧場。
唔知係咪因為觀塘係陳鑑林個地盤，所以佢特別投入？八方見曾主席和嫻姐喺典禮結束後，先後接受傳媒訪問就匆匆離開，反而陳鑑林同街坊踩足全場，重一齊高唱《明天會更好》。陳鑑林喺致辭時話，自己喺觀塘生活咗四十年，而佢嘅區議會同立法會議席都係多得街坊支持佢！
講開觀塘區，同場嘅郭必錚就話，順天邨呢排罪案較上年多咗，其中可能係秀茂坪邨重建，嗰度嘅道友走咗過順天邨搵食、交易。郭必錚重話，如果再嚴重啲就要開居民會，唔知熱愛觀塘嘅陳鑑林會唔會出席呢？
傳真︰2623-9278
電郵︰