香港經濟低迷，失業率有升冇跌，唔單止打工仔嗌晒救命，就連不少店舖老闆亦大叫生意難做，就像黎先生在香港玩具界打滾20多年，80年代因賣星戰產品名噪一時，可惜近年亦不敵疲弱的消費市道，結束店舖。不過今年年初卻在廣州重操故業，進軍玩具界，更在3個月內賣出10萬個搖搖！
記者：劉耀 攝影：陳智
1.貨源最緊要：要搵到穩定供貨商，或者有獨家或特色玩具。
2.凡事自己做：做事要瞓身，始終自己做就最穩陣。
3.資金要充足：做批發成日需要大量現金周轉，否則有生意都接唔到。
從事玩具業近30年的黎先生，由80年代開始以售賣電影《星球大戰》產品，因店舖名為「將軍行」，「將軍黎」的名字便在玩具界打響名堂。「我84年開始在尖沙嘴開設玩具店，到97年金融風暴後，由於市道一蹶不振，兼且業主唔肯減租，所以98年便將店舖結束。」店舖結束後將軍黎只做貨倉批發生意，令不少星戰迷欲購無門，所以遂於2000年在觀塘開樓上玩具舖。「可能因為年多冇開舖，所以第一年生意仍相當理想，但第二年就生意淡泊，最後惟有關門大吉。」
雖然店舖結業，但並未影響將軍黎的創業念頭，相反上年更獲中國Bandai總代理承諾，提供旗下產品，於是將軍黎就膽粗粗走到廣州成立廣州Bandai專門店。「由於我認識Bandai的中國總代理多年，所以他們願意提供貨源，而且在內地創業例如租金及人工等開支都比香港便宜，加上內地消費的水平逐漸提高，對較高檔的玩具亦有能力購買，於是就決定到廣州嘗試開設『星戰將軍行』，做批發之餘，兼做零售。」
既然有中國總代理的支持，將軍黎對開新店當然充滿信心，不過要搵合適的舖位就絕對唔簡單。「做玩具批發主要都係圍繞在海珠南路及一德西路的玩具批發商場，選擇比較局限，而且附近玩具店林立，地舖就相當罕有，為要找到心水舖位都要花上不少時間，亦好睇彩數，現時那舖位就由2001年8月開始搵，足足搵了4個月先搵到，而頂手費就要13萬，不過舖位喺正商場門口，所以租金比較貴，只得160呎地方都要萬幾蚊1個月。」
內地對港人北上創業的條件已逐漸放寬，「現時在廣州創業比起以前容易得多，就算港人亦可以自己做持牌人，唔需要同內地人合資，資金處理就可以更清楚。而牌照方面只要去工商局申請個營業牌，睇吓有冇撞店名就可以，其他例如消防牌、稅務證等，商場都會幫你搞掂晒，自己只係買個滅火筒、防煙口罩就得。」
一切搞掂妥當後，「星戰將軍行」就於今年1月1日正式開業，有總代理作為後盾果然與眾不同，開業頭3個月就賣出約10萬個搖搖！「做玩具最緊要識睇潮流，就好似時裝每段時期都會有唔同嘅產品，再加上嗰輪電視播邊套卡通片，就會興邊樣玩具，好似今年初搖搖熱潮興起時，3個月就賣出近10萬個搖搖。而4、5、6月就開始比較靜，但現時有新卡通片上畫，希望能帶來另一個熱潮。」
雖然玩具店成功在廣州玩具業站穩陣腳，不過當地的翻版事業橫行就令他頭痛不已。「內地的翻版速度相當快，簡單的玩具只要一星期就會有翻版出現，價錢亦只是正版的十分一，不過品質就相當差。」將軍黎更講出其經歷：「試過有個女人嚟買搖搖，指定要買正版，因為這個已是她當天所買的第7個搖搖，之前買了6個翻版都已經爛晒。」所以將軍黎就只好與翻版商鬥快，在翻版出現前盡快將正版出售，否則隨時有「坐艇」之虞。
開業短短半年，將軍黎已經有其擴展大計。「現時仍處於探索階段，要摸清楚現時廣州玩具消費者的口味，才知邊類貨受歡迎。待摸清客路口味後亦打算在附近玩具商場開設多一間分店，始終可以增加人流，對生意亦有幫助。」
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。