堅尼喺世界盃同國家隊領隊麥卡菲炒大鑊，之後重被逐出球隊，都可以間接理解為愛爾蘭喺今屆賽事未能取得更佳成績嘅原因。等大家都睇死堅尼呢一世都不受愛爾蘭國民及球迷所容之際，前日呢位曼聯中場隨球會回國獻技時，就竟然獲得英雄式歡迎喎！
呢一場由愛爾蘭球隊舒爾本對曼聯嘅友賽，舒爾本主場嘅八千個座位坐滿，由堅尼步入球場嗰一刻起，直到場波完咗都可以聽到有球迷高呼堅尼個大名幫佢打氣，睇嚟愛爾蘭嘅球迷除咗冇敵視佢之外，重好敬重佢㖭。照咁睇，麥卡菲雖然都帶得國家隊幾好，但係喺球迷心目中嘅地位，就始終都唔及堅尼！
萬人迷碧咸除咗靚仔同埋好波之外，原來心地都好好㗎！話說世界盃英格蘭國家隊由日本飛返歸時，球員均坐商務客位，不過當隊長碧咸知道守門員教練基文斯個女莎拉有咗四個月身孕之後，即刻堅持要同莎拉坐嘅經濟客位調位，等佢可以喺十六個鐘頭嘅航程坐得舒服啲，抵讚！
正當全球都經濟衰退，打工仔面臨凍薪甚至要減薪而喊晒苦之際，上季開始轉做職業化嘅英格蘭執法球證，喺新一季賽事就竟然有得加人工喎！不過睇返上季英超聯賽事，球證誤判事件又真係唔多，值得加人工嘅。
啱啱由車路士轉咗會去AC米蘭嘅中場迪拉邦拿，日前接受訪問時表示車路士組軍方針唔掂，嚟緊球季都唔慌有咩料到。其實迪拉邦拿搵到AC米蘭呢個好歸宿，實在無乜必要咁講車路士。