大胃王：
$130任食健康有機法國菜

好想肆無忌憚咁食勻Buffet枱上所有食物，一輪狂風掃落葉後，唔使做運動又唔會肥？邊有咁着數？但事實又真係可以做到喎！由頭盤到甜品，全部都係度身訂做嘅健康法國菜，材料用有機種植，未受污染，每日由大廚因應不同嘅新鮮材料，加上創意，炮製日日不同的法國菜，一個價錢任你食之餘，重唔使一路食一路驚會肥，咁就可以食得更安心啦！

記者：黃婉冰　攝影：陳智良
ImageGirl：Mon

雜菜配Quinoa沙律
呢種前所未見，一粒粒好似核嘅透明物體，法國名叫Quinoa，其實係一種類似種子嘅有機植物，但有機食物論味道始終差少少，較為寡口，所以要靠不同配菜如番茄、雜菜粒、發達芝士同油醋汁為它加上味道，這款另類沙律，你又有無興趣試試？

試味報告： Quinoa實際上無咩味道，但咬落又爽又脆，有少少似芝麻，但又無芝麻咁香，所以口感稍為取勝。

南瓜批 記者推介
批底嘅麵粉係一種未經農藥污染過嘅有機麵粉，至於批餡，除南瓜肉外，重有橄欖油、忌廉、鮮奶、芝士同雞蛋，將全部材料煮埋一齊，鋪滿批底，最後一焗，一道自創健康菜就此完成。

試味報告： 批皮酥香脆口，批餡有絲絲南瓜肉，南瓜嘅鮮甜味夠突出，香滑之中重可以食到帶少少爽甜嘅南瓜肉，食完唔覺甜膩，比蘋果批清香得多。

青瓜片伴三文魚
三文魚係自助餐中必有Item，但係唔一定要生食，好似今次咁，用芥辣汁塗滿成條三文魚肉，再鋪滿青瓜片，煮到半生熟，咁就可以將部份脂肪燒走，令魚無咁肥膩之餘，同時又有食魚生嘅感覺，青瓜片重可以加重魚肉爽口感覺，一舉兩得。

試味報告： 內外口感不一，雖然無魚生咁肥美，但油膩感亦減少，西式芥辣代替日式wasabi，配搭與做法亦日亦西，新鮮感大增。

沙樂美豬扒配迷迭香牛仔肉汁
豬扒？唔好啩！俾人話豬扒就話唔好啫，食又怕咩呢？何況經過大廚設計，口味與別不同。豬扒之上有沙樂美腸，腸之下又有雜菜、車打芝士，輕輕煎過兩面再放入焗爐焗熟，先煎而後焗可以保留肉汁，唔怕變豬扒乾，最後淋上用牛仔肉汁同迷迭香混合製成的濃汁，為豬扒帶來多一重味道。

試味報告： 豬扒味以外重有沙樂美腸的香辣，迷迭香汁有好香濃肉汁味，同豬扒夾到正，芝士同雜菜味道唔會過份搶鏡，恰到好處。

杏仁片提子糙米飯
此糙米飯不同彼糙米飯，這種生長於法國嘅有機糙米，粒粒都白白淨，無硬邦邦嘅紅穀殼連住，煮熟後，用油醋汁撈飯，加埋雜果乾、杏仁片，香脆杏片為糙米飯增添口感同杏仁香味，當沙律咁凍食，係炎炎夏日中白飯嘅最佳代替品。

試味報告： 糙米飯無想像中咁粗同嚡口，飯粒煙韌，有少少橄欖油同醋混合的酸香味，夾雜住香脆杏仁片同雜果乾，唔會過份清淡，味道頗特別。

朱古力慕絲蛋糕　紅豆糕
重量級朱古力慕絲蛋糕由朱古力、牛油、雞蛋等打起再焗製而成，與一般慕絲蛋糕好唔同；而紅豆糕係用有機紅豆加椰汁糕，依照中式做法製成，各有特色。

試味報告： 朱古力慕絲蛋糕，勁重朱古力味，口感似食朱古力。紅豆糕好有地道風味，唔太甜，紅豆唔會過腍，有咬口。

店名：ALIBI
電話：21678989
地址：中環雲咸街73號地下
自助餐供應時間：星期一至六中午12時至下午3時（請預早訂位）
價錢：每位$130
座位：130個
營業時間：星期一至四中午12時至凌晨2時；星期五、六中午12時至凌晨4時，星期日休息。
付款方法：現金及信用卡(Visa,AE,Master,Diners,JCB)