陸叔因為要做節目，每日食午飯都係十二點。咁就益咗左丁山走兩場，同佢喺陸羽二樓飲茶到一點，就走落陸羽地下同賓架L飲白菜豬肺湯，賓架L飲湯唔食「肺」，左丁山照食無誤，百無禁忌。陸叔與賓架L都係港大七三年產品，當然必屬佳品，零舍威啲，呢一年出咗一司三局長喎，你估咁易呀，再加埋賓架L、陸叔、張永森、周安橋、黃家倫、麥華章、陸觀豪等等知名人物，七三年港大都唔知有乜好風水！
返到公司，見到《蘋果》轉來新聞處處長蔡瑩璧嘅電郵，內云：「拜讀閣下於七月十日刊於《蘋果日報》『GG細語』專欄文章，文中提及問責高官接受傳媒採訪策略，並指本人『工於心計』，製造『欺善怕惡』之計。本人希望鄭重澄清，所有傳媒的採訪邀請均由各問責局長因應情況作個別考慮。由於訪問要求太多，局長自然難以於同一時間滿足所有要求。對於閣下『欺善怕惡』之說，我實在感到莫名其妙。
「至於政府新聞處在協助傳媒採訪方面，一向公平處理，過往如是，現今如是，將來也不會改變。」
蔡處長感到莫名其妙，最好向各問責局長嘅新聞秘書再三說明公平處理原則，大編輯曾提供資料叫左丁山寫古仔，總之各自心照。蔡處長既聲明「公平處理」，姑且信之，立此存照。