電影《夏日的麼麼茶》好多人都睇過，故事講沙灘買賣，𠵱家香港有個真實故事。新地最近透露，買咗大嶼山花坪一個沙灘，有成二十萬方呎，用嚟做馬灣珀麗灣住戶嘅專用沙灘，命名藍鯨灣。
蘭西對神秘地主甚感興趣，追查之下發覺沙灘地皮喺1910由ChanTamFuk（譯音陳談福）持有。新地在99年6月用5645萬買起佢，都算大手筆。個沙灘位置咁山卡啦，竟然值成五千幾萬，每呎地二百五蚊，老陳真係執到寶。
而新地雷霆早在珀麗灣未大搞宣傳前，已同蘭西講過，一定會買番個單位收租。近排珀麗灣宣傳攻勢浪接浪，但唔多覺雷爺再提起買樓事，反而頻頻講住「海天壹色」，唔通佢都想買呢隻？
雷爺話海天壹色得36伙，都唔夠分，所以唔會同客爭。佢同蘭西透露，其實想買個兩房單位，不過面積、坐向就重揀緊。
雷爺賣樓次次都滿堂紅，證明眼光好，跟住佢，應該冇衰啩？但連佢都揸唔定主意，咁想買珀麗灣嘅買家點算好？
新地已經決定珀麗灣喺葵芳新都會廣場做內購，公開發售就喺馬灣現場進行。
投資股票市場一向都要面對大起大落風險，好似過去幾日美股就出現大跌市，但以𠵱家銀行存款利率處於極低位水平下，股票仍然是唔少投資者嘅恩物。今個月中銀同長科分別招股，再現排隊場面，就連長實郭子威都認購咗500股中銀，同埋2000股長科，佢話啲股票用嚟畀自己同個女做儲蓄喎！後嚟又透露，佢阿媽都認購咗500股中銀。照蘭西分析，佢好可能實行分散投資策略，全家總動員每人認講少少，抽中嘅機會就會大啲啦！
蘭西每次去大嶼山愉景灣採訪，都會選擇坐船，當然知道可以搭巴士，但係只可以由東涌出發，太過舟車勞頓，搭船就寫意得多。今個月尾30號，中環愉景灣新碼頭正式啟用，喺民光街11號嘅3號碼頭，睇過發展商提供嘅資料同相片，個新碼頭設有冷氣候船室，炎熱天氣下更加受用，又有便利店、免費電話等等，航班亦會加密，到時由新碼頭入愉景灣，船程將會縮短至20分鐘。計計數搭地鐵由中環入東涌，最快都要半個鐘，蘭西以後都係揀海路囉。
發展商賣樓各出其謀，華東、華南地區通常以「乜乜」睇樓團做噱頭，但上海、北京呢啲大都會，單搞睇樓團又點夠呢？世茂集團北京御景園二期新御景，就以送雙人來回北京機票及入住五星級酒店作號召，展銷會期間認購就有得送。
其實呢條橋唔算新鮮，因為上海多個樓盤已經用過，好似湯臣集團嘅上海湯臣豪園、萬泰集團光明城市，都搞過送來回機票促銷，光明城市重送四日三晚酒店㖭。不過蘭西打聽到，新御景會送出兩晚免費入住北京中國大飯店優惠，雙人房每晚要成一千一百蚊，中國國際航空一張有三十日效期，來回香港至北京經濟客位機票，約三千蚊，兩夫婦合共七千一百蚊，計起嚟等於北京兩日雙人豪華團！買樓送豪華團，諗落都幾筍喎！不過，千祈唔好玩到唔記得去睇吓自己買嘅樓盤，唔係畀人問起唔識答就瘀啦。
市建局荃灣市中心（前稱七街）重建項目，招標結果日內揭盅，聽講所有入標發展商，唔想受「恒基擁有發展權」尾巴拖住，都揀一筆過買斷發展權方案，出價十五億至二十多億。出價咁勇，相信係市建局唔使發展商孭補地價，而且重開出只有在銷售額超過58億元，餘額先至分紅，比例由一成開始累進計，十分優厚。以總樓面一百四十萬方呎計，兩三年後賣樓，呎價要超過4140元，先至要分錢畀市建局。有發展商對蘭西講，如果到時賣到咁好價，就乜都得喎。市建局聽到後，唔知有乜感想呢？
特首董建華主政倡議起嘅薄扶林數碼港，工程搞得如火如荼，去年底先至為第一期平頂，事隔半年第一期寫字樓已入伙，隔籬第二期都漸見規模。
身為數碼港統籌專員譚贛蘭，當然要積極推銷數碼港畀中外企業，重話會親自招呼想喺數碼港拓展科技業務嘅潛在租客。
雖然有人認為數碼港交通唔係咁方便，但譚贛蘭話，除咗喺中環有巴士直接去到，新近亦開咗一條過海線，由數碼港去九龍中，遲吓會開多一條新線，由數碼港去紅磡。又話為咗照顧企業員工飲食，已積極游說裏面嘅餐廳早啲開業。
蘭西
電郵地址：