話之你個市有幾差，Rolex一年一度加價期又到；上星期潮流友至愛嘅運動型手表一概加達足足10%，即以往賣開$24,690嘅Submariner加到過$27,290、ExplorerII由約$24,000加到$26,770！有朋友本來快將要實現其要靚表目標，即刻窒住！
其實行內都知，以往香港賣高價表都不愁銷路，國內同胞、日本遊客買表都一定嚟香港，而中、港、日3地人都咁喜歡「撈」，行去AuthorizedDealer表行揀，都唔會畀你見齊咁多款表；不過呢兩年全世界經濟太差，大表行賣「撈」無炒高外重隨時會有九五折，呢個時候加價重加逾一成？確實係有點令人費解。即刻就有人抱陰謀論，話外間近年「責」舊貨都「責」咗唔少，呢招係用來清晒舊貨（可能重有表行會以舊價賣舊貨），吓，如果係就真係要買！
不過記者曾去表行打探過，只有極少表行肯以舊價賣表，而且只限比較沒那麼受歡迎的表款，如GMTMasterII，重講明「優惠期」只有幾日，即係到咗今日，呢招極可能行唔通。
記者：陳嘉文、何兆彬 攝影：伍慶泉
Sport款唔係人人啱，小記眼中的「永世經典」全鋼Datejust（男裝）已升價至$27,300，咁升法成世都唔會買囉。Daytona舊價約$38,000，新價$42,100，當然你知道無人係賣這個價錢的……想知其他表款新價可打去Rolex客戶服務部問問（電話：22498888）。不過好多表款街價同定價都係兩回事，例如ExplorerII黑面一般貴過白面，369亦不時有炒價，要買都係去舖睇吧。
4月時喺Basel展出過，乃今年大表面潮流下典型作，46mm的確好大隻，最近來港展出，小記戴過上手其實唔咁誇，好多人都戴到，採用C5011自動機芯，可儲7日能量。（約$80,000/8月到港）
的而且確，買靚表唔一定要買新表，呢隻全新企理新淨古董表固然是SellingPoint，但更攞命反是呢款60's豪華德軍表，竟然是玩貴價貨諸如法國寶磯（Breguet）備有即時回零的高檔功能，實屬罕有作！重有，豪華空軍小3針為上鏈機肉，而其3H標記則為夜光輻射達合格標準，真係Pro！（$13,800/古魯店）
同樣以飛行表打下江山的Breitling今期玩潛水，系列叫Avenger，石英版ChronoAvengerM1，採用Breitling「磁力驅動」原理，是世界上唯一能在水底1,000米（3,300呎）仍能正常操作計時功能的腕表，採用的"SUPERQURTZtm"CALIBER73機芯比一般石英機芯準確度超出10倍。（橡膠帶$18,300、鈦合金帶$21,100/各大表行）
古魯店（23978809）
旺角亞皆老街107號皆旺商場二樓212號舖