若然係幫襯開呢個地盤嘅讀者，一見到呢個題目就應該知道我又想講我對無厘頭大細超。若然係新相識，唔知乜頭乜路但係又有興趣想知的話，容許做少許前文提要。
話說約在年多前，剛啱做完《FM701》嘅時候，赫然發現自己隻左眼有唔妥，外觀上明顯地左眼大隻咗。由於約在兩年多前做過激光矯正視力手術，以為一定係手術後遺症，立即飛撲去搵眼科醫生，眼科醫生亦冷靜、細心兼審慎地展開研究。首先確定我雙眼的激光手術非常成功，因為視力良好及傷口愈合得好靚。繼而懷疑係甲狀腺出問題，即係坊間講嘅「大頸疱」導致眼突，經過驗血後證實又係冇事。經眼科醫生用精密儀器計算過後，發現其實隻左眼冇乜點突，反而係左眼上眼皮有少少吊，形成左眼不正常地大咗，於是再穩陣啲，花了數千元做磁力共振，結果顯示成個頭嘅血管都冇問題，即係唔係輕微中風。到咗呢個地步，眼科醫生作結案陳詞：「健康方面冇問題，激光手術亦非常成功，基本上乜事都冇，只係外觀上有點偏差」。
本來諗住男人老狗，健康上冇事就算數，但一齣動物紀錄片又改變了這個看法。那是一齣講述馬騮群體生活的紀錄片，片中見到一大群馬騮非常合群地生活，非常快樂地進行雜交，惟獨一隻雄性馬騮經常被孤立一旁，斯馬騮獨憔悴。近鏡一看，原來該馬騮的面相頗明顯地左右不對稱，旁述解說，雌性生物為着確保有強壯的後代，遺傳因子驅使下，必定會選擇體格有優勢的作交配對象，面相不對稱很可能是不健康的一個強烈徵兆，結果係隻隻馬騮有得交，嗰隻馬騮冇得交。淨係個樣有事都算數，但如果關交配事就冇得算，於是立定心腸去搵矯型醫生……
（待續）