馬會歇暑期間，一定有好多「寂寞的心」。房委會都好識體恤民情，噚日變身為香港賽龜會，喺黃大仙一個商場裏面舉辦咗全港首屆爬龜大賽，盛況空前。只見男女老少全部圍晒喺跑道側邊，加油打氣，原來賽龜重盞鬼過賽馬。
講番班烏龜先，參賽嘅龜共有十二隻，先進行三場分組賽，喺全長五呎嘅跑道上面鬥快，勝出嘅三隻龜再進行決賽，決定誰是「龜王之王」。唔好以為啲龜走得好慢，噚日隻冠軍龜三扒兩撥、十零秒就完成全程，一場由龜主到參賽龜自己都唔知為乜嘅全港烏龜打吡戰，話咁快就跑完。
勝出嘅係一隻大龜乸，龜主兼練龜師鄺先生同愛龜感情相當要好，唔單止食乜都預埋佢一份，有時夜晚隻龜重會爬上床同佢大被同眠。
鄺先生屋企養咗大、中、細龜各一隻，大龜近排頻頻有喜，已經生咗六隻龜蛋，鄺先生開始對佢有啲微言。
八方𢱑爆頭都唔明，房委會為乜要舉辦爬龜大賽，唔通想諷刺樓市復甦慢過啲龜爬行？幫房委會代辦今次活動嘅公關話，房委會今個暑假舉辦咗一項沙雕展覽，烏龜都係喺沙上活動嘅動物，所以就搞個爬龜大賽嚟配合一下。咁唔知佢哋遲啲會唔會舉辦埋「沙灘小姐」選美呢？
傳真︰2623-9278
電郵︰