美股上周五大插水，趙飛雲今勻真係無故捉蟲，其實今次跌浪唔算太突然，一早有迹可尋，大部份有經驗嘅投資者，上周多數已作出沽貨減持嘅部署，至於趙飛雲點解個倉重有貨，上周六有睇本欄嘅讀者應明白箇中原因，而今日要做嘅工作，當然就係補鑊。
現時後市仍睇跌，而趙飛雲目前持貨比重約佔1/3，加上新地（016）及中移動（941）屬優質股，長揸有機收復失地，消極做法可以暫時乜都唔做，等隻股出現轉勢迹象時加注溝淡。穩陣嘅做法，現時先沽出止蝕，候出現技術轉勢訊號補回。至於積極嘅做法，當然係沽貨止蝕，兼反手追買啲恒指Put輪9205，但注意轉身要快，過夜宜小注。
散戶一般有個通病，就係手上揸住嘅股票輸緊錢時，將全部精神放晒落去，諗住輸多輸少嘅問題，唔識捕捉其他會升嘅股票，其實喺大部份嘅情況下，進攻都係最佳防守。當然先決條件係仍有本錢可運用，所以除非確認正處於一個明顯的牛市或熊市，否則應保留起碼1/3至1半資金，應付突然急轉嘅市勢。
趙飛雲