早排，霆鋒撞咗部限量版嘅奧迪RS4，雖然聽講話部車最後都要報銷，但總算吉人天相，人身就無乜事，由於部RS4當時係以過百公里嘅時速，炒埋去部堅如鋼鐵嘅舊款平治S-Class身上，但霆鋒重能夠執番身彩嘅關係，因而令唔少車迷再度注視起奧迪，並有另眼相看嘅感覺㖭！據知，近期重多咗人買奧迪作座駕，尤其係貌似RS4嘅A4Avant，你都咪話唔要寫個服字。然而，雖然話部RS4經已停產，但另一款簇新更高級嘅限量版奧迪RS6，遲吓就會運抵香港；呢部新車唔止有五門Estate嘅旅行車款，兼且重有四門轎車型號，全港配額只得10部，聽講𠵱家代理都只係剩番一、兩部Quota咋！想擁有嘅Fans就要行快步喇！