陸叔約食晏晝，地點當然喺陸羽。陸叔叫陳永陸，佢間公司叫「裕陸控股」，你話「陸羽」同「裕陸」幾相似呢。去到陸羽二樓，陸叔話如果陸羽有六樓，佢一定會坐上去，開茶飲乜茶呀？嘻，你或者會估中，就係「六安」茶。據講六安不寒不燥，冇普洱咁削胃，當然亦唔會寒涼！
陸叔送左丁山一本新書，名為《陸陸無窮句句金》，由佢自己出版。陸叔之處女作名為《股海心經》，呢本名為金句，唔通有金執？翻開睇吓，呢本書有創作總監，將平時陸叔嘅口頭禪同埋警句，化成十字真言、十二字真言，先由Peter、Gary、Mary、張師奶對話，再加陸叔評語註解。驚死你睇唔明，再加漫畫插圖說明，真係夠晒userfriendly，做讀者嘅，冇得投訴啦，陸叔實情係餵飯餵到你個口。
金句一共有六十六句，第一句係「投資先學印，方能成大任」。第六十六句係「今朝有損失，他日成心得」。其他如「升跌無常莊家股，少沾為妙無痛苦」、「賺錢一次便足夠，何須長期去搏鬥」。嘩，全部六十六句啃完，消化晒，你我都可成為投資專家。書中創造嘅人物如Peter、Mary等等，有人扮儍、有人扮精、有人扮老實，就係金魚缸嘅散戶嘅寫照，同啲散戶傾吓偈，包保有人犯晒陸叔所講嘅錯誤。
陸叔謙稱話今個星期就滿五十歲，新書係「臨老之作」，其實佢臉如紅粉，身輕如燕，一啲都唔老，擔保佢以後嘅新書，源源不絕。