楊紫瓊雖然經歷過一段失敗的婚姻，但她卻從未對愛情失去信心。不過，坦言不再覺得一紙婚書可代表任何保證的她，即使現在與男友鍾再思相處得十分愉快，卻從未有再婚的打算，只一心一意沉醉在開心與互相扶持的二人世界之中。
於大馬、留學英國的楊紫瓊（Michelle），八五年正式來港發展，在因緣際會之下加盟德寶電影公司，後來更與德寶公司老闆潘廸生共諧連理，可惜數年後二人又因了解而分手。不過，Michelle裙下始終不乏追求者，曾先後與富商楊秉樑及一位美籍心臟科醫生關係親密，更曾經與後者訂婚，但最後又解除了婚約。
前年Michelle因工作關係，邂逅了前寰亞高層鍾再思，對電影有共同理想的二人，除發展出一段感情關係外，更一起創立了電影神話公司。
Michelle在感情路上，雖然曾經歷過不少波折，但她從未對追求愛情感到畏縮。Michelle說：「對我嚟講，愛情同事業一樣咁重要，而且我覺得兩者可以同時兼顧，我唔會因為曾經有過一段失敗嘅婚姻就抗拒再婚，不過喺我眼中，一紙婚書已經唔再係一個保證，兩個人喺埋一齊，最緊要係開心、互相尊重、了解同互相扶持，結唔結婚已經唔重要，除非有咗小朋友啦！不過可能對其他人嚟講，結婚係好緊要都唔定，但對我本人而言，其實我呢生尋找最寶貴嘅嘢，就係開心。」
鍾再思現在既是Michelle的工作夥伴，又身兼情人的身份，二人在工作上難免會有摩擦，但Michelle對男友卻似乎有讚無彈，她甜絲絲地說：「Thomas（鍾再思）好能幹同聰明，份人又好直，我最鍾意講嘢直接嘅人，因為咁你先至可以聽到真正嘅批評，夠膽指出我嘅缺點，而且對我好尊重，教識我好多嘢。我哋一齊做嘢雖然會有爭拗，不過我哋兩個都係好理智嘅人，大家都係對事唔對人。而且我哋有共同目標，都係想做好件事，所以拗完都唔會傷感情，離開公司就冇嘢。」
撰文：陳月媚
攝影：林德雄
服裝提供：鄭兆良