除了愛情之外，楊紫瓊自言大馬的家人對她也十分重要，每每在心情不佳時，她最思念的人就是父母，希望可以摟着他們大哭一場。
Michelle說：「我同屋企人關係好close，只要有時間，我就一定會抽時間返大馬探佢哋，喺媽咪同爹哋心目中，我好似永遠長唔大咁，就算到𠵱家我返到屋企，夜晚十二點要去街，媽咪都會話咁夜重出去，佢會擔心我。」
年前Michelle的弟弟因投資失利，賠掉過億港元外，更惹上官非，外間有傳楊紫瓊亦有份畀錢給弟弟作投資，不過Michelle卻否認說：「我從來都冇畀過錢細佬做生意，呢啲只係誤傳，因為我唔係好識做生意，唔會冒險。不過嗰次細佬蝕咗咁多錢，佢都好心痛，爹哋都有提佢以後做生意一定要好小心，而我作為佢家姐，當然有安慰佢。」
離開大馬這麼多年，雖然經常不在父母身邊，但Michelle對雙親仍十分敬愛，家中如果發生甚麼事，她都會盡量抽空返大馬了解，平時Michelle則依賴電話和E-mail與家人聯繫。
Michelle笑說：「爹哋不知幾叻，成日會用E-mail同我傾偈，有時我太忙冇開電腦，佢重會打電話嚟問我有冇收到佢嘅電郵。我成日同爹哋、媽咪傾心事，佢哋對我嘅性格好了解，唔開心嘅時候，我最想佢哋係我身邊，攬住佢哋我就覺得好溫暖。」