董家班今個周末有好節目：就係由特首帶隊齊齊去黃金海岸，閂埋門「退修」，認真諗吓度吓點樣應付𠵱家香港嘅嚴峻局勢，同埋一月份嗰份施政報告有乜好橋。
其實，今個月初新班子啱啱組成嘅時候，董特首已經集齊三司十一局嘅阿頭，加埋成班常任秘書長喺禮賓府開咗個前後夾埋一日半嘅集思會，但當時撞啱世界盃，大家傾吓傾吓，個心都飛咗去個波度，有人重話約咗人食飯急急腳走咗，查實都係想趕返屋企睇南韓對德國！
可能前車可鑑，今次特首為咗認真咁傾，專登等埋煲呔同阿松兩位司長，今個星期返齊嚟開工之後，喺嚟緊星期六放工後拉大隊入屯門黃金海岸，一於過埋夜到星期日先出番嚟！
又係黃金海岸？冇錯！上年董特首秘密帶隊入黃金海岸退修，事後叫好又叫座，今次咪一於食過翻尋味囉！重記得上年退修營，董特首知道俞宗怡鍾意食黃油蟹，專登order畀佢，個個食到嘴舔舔，梗係拍晒手出番嚟啦。
不過咁，事隔一年，人面全非，經過問責制一場大執位之後，好多人都已經不在其位，或者頂頭多咗個新局長，好似俞宗怡秘書長咁，之上多咗個唐英年局長，今次有冇上次退修得咁盡興，就真係唔知嘞！不過近排咁多勞資糾紛，失業市民睇怕都要望班大帝，喺黃金海岸椰林樹影、水清沙幼嘅環境下，諗條好橋出嚟嘞！
傳真︰2623-9278
電郵︰