識得我蘇民峰嘅朋友，都知我出去蒲嘅時候，唔鍾意俾人哋叫我贈兩句，但唔代表我孤寒，只係唔想將工作同娛樂撈埋一齊啫！我會一連五日講吓點樣喺屋企擺比較簡單嘅風水陣，而黃卓玲就借咗佢間屋出嚟作示範。第一日要講嘅梗係男女都好有興趣嘅桃花陣啦！
今年嘅桃花位喺東北，最簡單嘅就係喺屋企嘅東北位擺音樂盒同一杯水，咁就可以催桃花，桃花亦代表人緣，除咗可以識到異性密友之外，亦可以識到多啲朋友。但記住，音樂盒一定要係上鏈嗰隻，時不時等佢唱吓歌仔。
想快啲結婚嘅朋友，今年嘅姻緣位喺正西，喺正西放四棵綠色嘅植物，另加九朵紅色嘅花，咁就好快可以心想事成，但只想拍拖唔想結婚住嘅，就淨係擺四棵綠色植物就得。
風水當然唔係咁簡單嘅事，每一年嘅流年桃花位都唔同，但每間屋其實都有一個永久桃花位、財位同埋凶位(亦即係病位)，今次就同大家一次過講晒（見附圖），記得keep住個表，嚟緊幾日都會有用。用屋企嘅大門位嚟作指標，好似黃卓玲間屋咁，大門口向東北，桃花位就喺正南，喺桃花位擺四棵綠色嘅植物就得。
想催旺桃花，除咗風水之外，佩戴飾物都有幫助，知道自己嘅生肖，就知戴乜嘢同生肖相配嘅飾物旺自己（見備註）。記住我蘇民峰講「桃花多多都唔怕，最怕個人心多多！」
備註：鼠配兔、豬配龍、蛇配狗、馬配雞、羊配猴、虎配牛
(五之一)
口述：蘇民峰 筆錄：張止寒
攝影：馬啟然 住宅提供：黃卓玲