喺1999年在香港推出嘅標緻206GTi，由於車身小巧、走位靈活、車架紮實、2.0公升偈有137匹馬力，性能有番咁上下之餘，操控樂趣重好高，除咗被傳媒冠以彎路之皇嘅稱號外，多年來亦係最暢銷嘅Hot-Hatch，新車價一直企穩14萬5千元。而市場上於年多前有二手206GTi放盤時，承接力頗強，落地一年嘅放盤成交價達10萬元以上，但近半年二手價有較顯著嘅調整，1999年車7萬元左右已有交易。
GTi二手價近期有較大調整，除市場累積咗一定數量嘅二手放盤外，保險問題亦開始阻礙206GTi嘅交投。由於部車劈得，不少較激進嘅車主便不斷挑戰部車嘅極限，失手者難免會造成意外，保險索償個案上升，不少保險公司都大幅加保費或拒絕部份人士投保，逐漸形成市場供求失衡，對二手價進一步受壓。
由於206GTi係法國車而非大熱歐洲品牌，加上新車價抵買，供應量充足，故就算市場反應佳，亦沒有水貨車出現，市面上放盤嘅206GTi全屬行貨；由於年份不過三年，原車主應有定期返原廠Check車嘅習慣，所以買車前最穩陣係查清楚部車有冇定期返廠，如上手用家已有一年半載未返過原廠作檢查，保用條款可能用唔着㗎喇。
另外，不少GTi已大改特改，由胎軨避震、到引擎電腦Chips都有得改，部份改咗電腦及死氣喉嘅206GTi，中尾段性能明顯爽好多。但購買經過大量改裝嘅206GTi，就要留意改裝及調校功夫是否到家，始終改標緻係要有專門技術，一般改裝舖嘅功力可能會比較參差。改裝件合法性亦要考慮，否則有機會失去保養資格或觸犯法例，甚至係保險公司不受保㗎。
睇二手206GTi時，一定要落足眼力睇勻全車任何碰撞痕迹，因為不少高手都係喺甩尾情況下失手，撞尾或翻車情況均有出現，不妨加以留意車頂及A柱位有冇接駁痕迹，但一般人沒有修車概念，根本難以辨別，最穩陣梗係搵自己指定嘅維修師傅幫吓眼啦！
而自己試車時，就愈長時間愈好，除咗試真各樣電器，如冷氣、電窗及天窗嘅操作外，亦要留意表板水溫及各項警示燈是否正常，行車就要留意轉波鬆極力子時，動力銜接是否流暢冇異響，如出現跣極力子，隨時要數千元維修費。最後傾妥價錢，亦要確定可以出到保單才落訂呀。