足球「擺烏龍」就見得多，籃球「擺烏龍」雖然唔係冇，但我Dr.Fun今次現場就親眼睇到嘞，呢勻都係第一次。
話說噚日女子十九歲以下組嘅銀羚對鳳凰一場比賽，之前兩戰兩勝嘅銀羚，小前鋒伍嘉敏唔知係咪俾勝利沖昏頭腦，開波時接應隊友傳球，眼見無人看管就第一時間搶攻，最好笑就係嘉敏走嘅方向，啱啱同隊友相反，雖然其他人都有叫停佢，但嘉敏一於好少理，「開齋」最實際。
當嘉敏將個波射入籃框後，球證都有些少手足無措，而一秒「deadair」後，跟住出現嘅就係全場笑聲，可憐嘅嘉敏呢個時候先知道自己「擺烏龍」，表情非常尷尬。好彩，銀羚最後都可以贏波，如果唔係嘉敏就會變成輸波罪人。