在影壇打滾了十多年的楊紫瓊，是香港首席女動作演員，九八年受荷李活片商垂青的她，被邀請參演美國占士邦系列電影的《新鐵金剛之明日帝國》，在片中身手不凡的邦女郎角色，令Michelle成功打入國際市場。
其後在李安電影《臥虎藏龍》中的俠女角色，更將她的演員生涯推上另一個高峯，連美國奧斯卡都邀請她擔任頒獎嘉賓，更獲大馬政府封為拿督，寫下生命中光輝的一頁。
不過，Michelle亦深明演員未必可以做一世，所以她從數年前開始，已經為轉投電影幕後工作鋪路。年前Michelle與男友鍾再思合作成立電影公司，創業作《天脈傳奇》下月一日便會在香港上映，Michelle喜孜孜地說：「第一次做監製，心情真係好緊張，有咗自己嘅公司之後，我每朝早九點半就返公司做嘢，做到天黑先收工。今次試過做監製之後，喺Thomas（鍾再思）幫忙下，我學識咗好多嘢。」
Michelle續說：「以前只係做演員，對電影嘅製作過程只知道啲好表面嘅嘢。但今次我落手落腳做監製，由一部戲嘅籌備、製作、後期、發行同宣傳，我都要理晒，工作量係大咗好多，雖然冇做演員咁舒服，但滿足感相對地亦大好多，所以我會繼續做監製，可能再過幾年，我會全身投入幕後工作都唔定。」
《天》片總投資近二千萬美金（約一億五千六百萬港元），但Michelle卻不擔心賠本，她極有信心地說：「呢部戲賣埠價錢好好，只係一個美國市場已經賺番好多錢，所以我冇擔心過。呢部戲拍嗰陣冇超時、冇超支，對於我呢個第一次做監製嘅新人嚟講，已經好難得，咁當然我要好多謝公司上下員工嘅鼎力支持啦！如果冇佢哋，我就未必可以做得咁順利，希望觀眾睇完齣戲之後，可以睇到我付出嘅努力。」