你好。我老公叫曾蔭功，你可以叫我曾師奶。我同你一樣，係負資產。自從九七年買咗樓，我哋衰足咁耐。減薪失業，個大仔又失學，層樓睇怕一百年都供唔完。燒炭都唔掂。
本來我好鬼妒忌你──嘩，有個明星咁縱欲，任你個個月買幾十萬衫；又有個富商咁癡迷，幫你挽鞋棄家，老婆死咗都唔記得立墓碑。不過報紙話，原來四日內兩個男人都破產，一個着草一個靠女友交租，眼泛淚光。你孭住炒燶樓二億五巨債，重可以他他條條咁shopping碌卡逛書展，一啲責任感壓迫力都冇，幾咁風騷，真令人敬佩：「言教不如身教」，你對仔女學得一成，都係人中龍鳳。
今日睇到（收音機又播）有人話：「除咗李超人之外都好難養得起佢。」你千祈唔好呀，小市民要打電話、去超市shopping、食快餐、住屋、買日用品、聽收音機、睇報紙、上網……遲吓重轉台睇埋亞視，萬一你搞到最威猛嘅李伯都……埋，我哋就水深火熱喇！
你要搵過第位，我肥師奶同埋所有負資產都瞓身推薦董伯──佢冇李伯咁位高權重，但唔失禮過陳伯噃。你早啲搵佢，上個禮拜就飛咗巴黎唔使連任啦。不過五年之內立功，仍然係香港嘅苦海明燈，封你做國母，立碑紀念。