港股噚日受美股拖累，挫127點，收報10325。不過，外圍尚未穩定，歐洲股市大幅下挫，美股可能因此進一步下滑，港股短期要跌破10000，甚至9000都唔係太難，而且期指又以淡倉為主，結算前應該向下滑。
中銀香港（2388）今日宣布招股定價水平，以目前嘅市況，若真係照顧散戶利益，應該以下限定價，咁就真係益街坊啦。
繼華聯國際（969）本周二急挫逾70%，噚日又爆一隻正中藥業（327）大跌76.55%，收報5.3仙，成交金額達5061萬元，成交股數達8.98億股，等於已發行股本43％，據聞係有主要股東遭斬倉。
黑客話，早就講咗二三線股近期有難，相信爆煲情況陸續有來。
早排大炒納米概念嘅佑威（627）近期積弱，據聞炒家持放棄態度，加上此股由0.25元水平起步炒上，重有下跌空間。噚日隻股再跌7.4%，收0.50元。
資本出版（8155）首日急升77％，但第二日隨即下挫45.3％，兼跌破招股價0.30元，收報0.29元，暫時重見南華證券頂住股價。
不過，Cookie話應該唔頂得好耐，有意撈底者要小心，因為成交已經開始萎縮至925萬元，最終可能變成冇成交，屆時想沽都難。
ｅ莉莎話，海峽金融正式行使中國燃氣（384）換股權，買入１億股正股，行使價為每股0.16元，遠低於噚日收市價1.37元，即係話有大把獲利水位。
海峽金融最多可行使認股權向恒鋒集團（185）購入最多3.6億股中國燃氣，有貨要小心。
阿 虎