哥連拿果然係球證界嘅星中之星，歇暑無比賽吹依然做大忙人。佢除咗早兩日擔任時裝展嘉賓，又先後為足球電影同音樂片段（由佐治米高主唱）擔任配音工作。據佢講，佢一直希望與人們打成一片，務求改變大家認為球證嚴酷的標籤印象。
光頭佬本身係一個財務顧問，如果為錢根本唔需要做球證同拍廣告，所以佢話一心改變球證形象唔似吹水。如果所有球證都好似光頭佬咁親切又不失威嚴，未嘗唔係好事。如果個個球證成日扮晒嘢黑口黑面，畀你都唔鍾意啦。
有報道話土耳其龍門魯斯度唔轉會超聯而揀留喺土耳其嘅費倫巴治，唔係佢念舊，而係佢老婆唔畀走。雖然啲人話怕老婆會發達，但係我求大俠就覺得如果魯斯度就算真係聽老婆話，都未必會發達。所謂魚唔過塘唔會肥，若然魯斯度一世踎喺土耳其，邊會有出頭嘅一日呀！
𠵱家個經濟環境唔好，搞到啲歐洲大球會好似皇家馬德里同祖雲達斯咁，出唔起錢買啲貴價球員，間接令有機會以超過三千萬鎊過檔曼聯嘅李奧費迪南，日日見報。英國嘅《太陽報》就連續三日用李奧費迪南轉會嘅新聞做頭條，我求大俠覺得咁樣煲法，單料就算幾有趣，都會煲到悶啦。
意大利舊金童巴治奧最近不斷發牢騷，重講緊國家隊教練查柏東尼針對，唔選佢踢世界盃。佢堅稱好唔忿氣之餘，矢言要四年後以三十九歲之高齡踢二○○六德國世盃。大家都知巴治奧信佛，不過聽完佢呢番爆炸性發言，睇嚟呢隻老馬重好夠火氣。