善於解決難題嘅房屋及規劃地政局局長孫明揚，原來同香港賽馬會過唔去，佢有個好友噚日洩漏咗佢個鮮為人知嘅「退休鴻圖大計」，就係設計一條賭馬方程式，包贏馬會咁話！
孫公噚日以署理政務司司長身份，出席國際獅子總會港澳303區聚餐會演講，該會前總監譚榮根介紹孫公出場時，透露咗孫公嘅嗜好。
譚榮根話：「孫局長平日鍾意打衞生麻雀，一、二蚊嗰隻，都係幾百蚊上落，佢嘅口頭禪係：『麻雀打唔贏，打嚟做乜？』佢重話退休有個鴻圖大計，就係設計一個方程式，包贏馬會錢嘅，我聽到之後好開心，諗住終於有個朋友可以幫我發達，點知佢𠵱家又做咗新局長，我諗發達嘅夢想又要延遲幾年。」台下嘅孫公就會心微笑。
其實孫公興趣廣泛，尤其鍾意睇書，上至天文，下至地理，譚榮根說：「有次講開睇書，佢同我講黑洞嘅成因，我淨係識答：『我𠵱家就真係好似黑洞。』因為講極我都唔明。」
傳真︰2623-9278
電郵︰