正所謂慢工出細貨，任天堂講咗成年嘅招牌大作《SUPERMARIOSUNSHINE》終於喺星期三到咗香港！由於日圓近期升到巴巴聲嘅關係，遊戲曾升上$480，鐵人同啲行家傾過，好多客都嫌四百幾蚊買隻GC遊戲太貴，所以銷情麻麻！現價約$410。
限定發售
重記得幾個月前，日本SONY喺網上推出顏色限定版PS2主機；由於當時實在太多人想買啦，搞到預訂當日做成網絡大塞車！而且時至今日，呢隻顏色限定版PS2嘅機價，都企硬喺$4,000-$5,000價位，你都咪話唔犀利！
上次買唔到顏色限定版PS2嘅機迷要注意啦！早兩日（7月18日）SONY又再推出透明色限定版PS2，主機顏色分為分透明藍同透明黑兩款，而且隨機重會附送直身機座同原裝遙控器一個，暫時知道日本定價為30,000日圓（約港幣$2,000）。
今個暑假檔期，各大主機嘅新Game來貨情況，只可以用「說多不多、說少不算少」嚟形容！大致上和舊年同期差唔多。
不過由於近期翻版問題猖獗，搞到Game場好多舖頭，都唔多願意嘗試入一啲較冷門嘅遊戲！就好似上星期PS2隻《我的暑假2》，就由於冇人返貨嘅關係，所以被炒到上$480價位！
講開炒Game，PS2《GunGrave》日本限定版亦已經到港，現價約$680，GBA隻《超魔界村R》就賣$280，而GC《沙灘排球》就$390左右。