上兩個禮拜六日，銅鑼灣街頭遇見啲型仔型女塊面珠都係紅卜卜，波鞋占解釋呢班人都係去完跳蚤巿場，所以曬完咗返嚟。原來𠵱家香港都開始流行類似日本經常搞嘅跳蚤地攤文化，同以前歐美嘅跳蚤文化唔同，場內唔係賣古董字畫，擺檔大多係𡃁仔𡃁妹，賣嘅係𠵱家興緊嘅牌子，咩拾篇、猿人、孖V崩后、關刀科時，通常都係自己着過後唔啱心水再轉售，價錢比水貨平。聽波鞋占講嗰個跳蚤巿場反應唔錯，相信陸續有嚟。
波鞋占解釋，如果搞多幾次成為氣候，相信最贊成係水貨店，因為跳蚤巿場屬第三手巿場，班客仔喺水貨店接貨後唔啱心水，都多咗個門路甩走件貨，以後買嘢都爽手啲，唔會左度右度。大食Jack問跳蚤巿場最受歡迎係乜？波鞋占話佢估唔到係着舊咗嘅猿人Tee，賣二百零蚊個個爭住搶，就算條領發黃，啲𡃁仔都唔介意，重當佢哋係古着收藏。拾篇BoxTee𠵱家最多人搶，就算着過賣九百零蚊件都冇問題。波鞋占話，以後着舊咗嘅裏原宿Tee唔使頭痛點處理，以前攞去捐，驚人哋得物無所用，𠵱家賣到錢反而可幫助真正有需要嘅人。
主持人：大食Jack
八卦熱報：