同馬主N喺文華ClipperLounge飲完下午茶，經天橋行去置地廣場，路經「阿民興昌」呢間裁縫名店，總有種誘惑，伸個頭裝吓。只係裝吓啫，我哋邊有資格入去做西裝，城中富豪先有此資格。
裝完擰轉頭，幾乎碰到人，好彩閃得快；一把女聲響起：「左丁山，你幾乎撞親我呀！」一望，原來係靚女祖安，佢以前係銀行中級經理，一年前轉做保險經紀，點解唔做銀行改做保險，理由大家都知道係乜，唔使畫出腸。
祖安話：「你咁冒失，使唔使買番一份意外保險？」唔使乘機sell我啩，於是對佢講：「做西裝都冇錢，買保險做乜。」祖安話：「唓，唔一定要入阿民興昌充大經理啫。話你知，司徒拔道嗰間保險公司大廈，經常有裁縫上門，度身、試身，一手包辦。每套見得人嘅西裝，連工包料，只收一千五百。大廈內好多鬼佬僱員，一做就幾套，佢哋話慳水慳力慳時間喎，呢位裁縫攞咗訂單，就上深圳叫夥計開工，聽講快而準，生意多到做唔切，你有興趣嘅話，我介紹個裁縫上你公司度身。佢做埋恤衫㗎，好似係百五蚊一件。」
呢位裁縫每日來往深圳，勤力兼辛苦，唔怪得香港啲一般裁縫，生意清淡。如果自己上深圳做，一套西裝平過一千蚊，但勞師動眾，過關麻煩，不如等裁縫上門度身試身，舒服兼舒適，畀多幾百都算抵啦。