證券界噚日最關心最熱門嘅話題，唔係中銀（2388）掂唔掂，亦唔係長江生命科技（8222）有冇機會玩大反彈，而係正中藥業（327）股價點解會勁插？
小初真係估唔到，原來成班經紀老友所屬嘅證券行，好多都有做呢隻股票，所以隻股勁跌，佢哋都受牽連。正中股價噚日最低見過4.8仙，收5.3仙，成交股數高達8.98億股，成交金額5061萬元。
經紀陳話，隻股以往好少街貨，但自從大老闆早排大幅減持後，股價就開始放軟手腳，噚日晏晝失驚無神殺個大型沽盤出嚟，證券行即刻Call孖展，但因為實在跌得好急，所以嚟唔到錢就被斬倉。
好彩班經紀老友嘅行借出孖展唔大，損失有限。
經紀陳話，隻股沽得最狠之時，有人買得重狠，明顯有人低位收貨，若大股東手貨冇事，唔排除後市會出現反彈。
慕容小初