任天堂之寶瑪利奧相信無人不曉，今個夏天喺GAMECUBE上推出新作，一貫動作加解謎元素玩法，不過就加入全新嘅大水泵系統，全隻Game都係攞住水泵周圍噴，加上過往慣例，要爆機兼儲齊隱藏嘢唔係咁易，想度過漫長嘅暑假，就要試吓呢隻清涼透心嘅《陽光瑪利奧》喇。
記者：徐影龍
嗚謝：DreamStore（東方188）
話佢係一隻清涼透心嘅Game一啲都冇誇張，事關遊戲內容講述瑪利奧連同公主及蘑菇叔叔，一行三人到海豚島（DolphicIsland）旅行，島上充滿陽光與海灘之餘，因瑪利奧為洗脫嫌疑，需要用水泵將島上各種塗鴉清洗乾淨，及對付大量敵人，故此成隻Game基本上都係攞住水泵周圍射，視覺上已經涼浸浸。
大水泵除可清洗塗鴉及攻擊敵人外，隨住故事發展，重可以執到唔同用途嘅水泵，令瑪利奧添加各式移動方式，有啲隱藏道具及太陽金幣等必須對應水泵先攞到，玩家務必盡快熟習各種水泵用途。
今次係瑪利奧打正旗號首度登陸GAMECUBE，玩法基本上同N64舊作《瑪利奧64》冇乜分別，有玩開舊作嘅玩家好快會上手，另外在拿到水泵後，遊戲會進入教學模式，教大家點樣運用各式水泵。
同舊作一樣，今集係需要收集特殊道具，除例牌嘅普通金幣外，今集新加入一種名為「太陽金幣」（Shine）嘅特殊道具，雖然實際用途未明，不過按慣例都係同爆機後出現隱藏事件有關。太陽金幣散落喺海豚島每個角落，而且極為刁鑽隱蔽，要儲齊非一件易事，據知目前已有機迷最高攞到五十粒Shine，金幣總數有幾多仍是未知之數。順帶一提，遊戲內設有協助村民劇情，成功後可獲得藍色金幣，儲齊十個藍色金幣便可換一粒Shine，所以玩家要積極咁幫助村民先得㗎。
今集瑪利奧仍然唔係單獨應戰，同佢由細玩到大嘅忠心寵物Yoshi都會登場，由於今集設定Yoshi怕水，所以當瑪利奧騎住Yoshi時係唔可以用水泵，幸好Yoshi仍保留有攻擊敵人嘅威力，攻擊模式仍然係先吞後吐雜物，有啲地方更需要利用Yoshi先可到達，可謂一隻重要嘅寵物。
敵人方面，再唔係以往得意可愛嘅蘑菇類，除污糟邋遢嘅塗鴉怪外，重有大量體積龐大，樣貌恐怖嘅敵人追住你，攻擊方法重係千奇百怪，真係細膽啲都畀佢嚇親。
《SUPERMARIOSUNSHINE》
對應機種：GAMECUBE
開發商：任天堂
遊戲類型：動作＋解謎
遊玩人數：一人
價錢：$410
(c)1990,1995,2002Nintendo