陳啟泰主持嘅遊戲節目《百萬富翁》，前晚喺亞視總台進行「法內情2002慈善特別版」錄影，袁詠儀、任港秀、任葆琳、蕭若元同恬妞等都有到場參與遊戲，而任葆琳男友胡驊亦有到場支持。經過一輪激鬥，蕭若元與恬妞不負眾望勝出，贏咗五十萬的獎金。連同其他幾位嘉賓嘅獎金同亞視慈善基金撥出尾數，一共為公益金籌得一百萬善款。
蕭若元同恬妞一組，當蕭若元答中五十萬嘅問題後，佢哋就挑戰一百萬題目，陳啟泰問佢：「伯樂先師寶誕是農曆六月幾日？」正確答案係農曆六月二十三日。
蕭若元有見獎金係做慈善用途，所以佢冇博到，恬妞話：「答問題嗰刻，我突然有好強嘅第六感，我覺得會係二十三日，但因怕答錯，所以決定攞走五十萬獎金就算。」
另外，袁詠儀答問題時，有一條問題問到佢男友張智霖個花名，除咗叫「包撞板」外，重叫乜嘢，佢即時打電話問張智霖先知佢叫「侍仔榮」，認真搞笑。
徐子淇前晚同媽咪一齊出現中環蘭桂坊，原來子淇係去CClub出席模特兒公司嘅派對。
徐子淇話：「我有時都會同朋友嚟蘭桂坊玩，因為大家一齊飲吓嘢，傾吓偈都幾開心。不過，我自己就知自己事，我一定唔會飲酒，因為酒精好高卡路里，飲得多重易致肥㖭。」
早排鄭秀文（Sammi）同蘇永康、梁漢文等人，為商台嘅廣播劇《巴治奧》錄音，今次Sammi做一個時裝界嘅TopSales，不過因為工作緊張，搞到佢口臭兼有臭狐，後尾重要喺羅湖商業城賣波衫。佢話：「我好鍾意錄廣播劇，有時投入到連林海峰話放食飯都唔想，而且黃偉文成日爆肚好好笑。」
二人組合Shine嘅徐天佑同黃又南噚日出席灣仔會展舉行嘅第十三屆書展，替fans簽名。
現場一早就有過百fans聚集，當兩人一出現，情況即時失控，所以大會為咗安全起見，將簽名會臨時取消。好在班fans體諒佢哋，冇鼓譟。
陳錦鴻噚日為商台嘅《茶煲裏的查篤撑》做嘉賓主持，講到日前陳小春搶記者攝錄機事件，報道指佢帶小春一齊去夜總會尋歡。陳錦鴻話：「我嘅經理人公司已經接手處理緊，所以都係要等佢哋回應。」而經理人公司方面指佢哋只係去卡拉OK消遣，陳錦鴻話喺嗰段時間，佢去咗細妹屋企食飯。
王敏德俾噚日出版嘅一本周刊話佢一個人去診所睇性病，噚日佢太太馬詩慧去尖沙嘴出席活動時，就好勞氣咁話佢老公有直升機牌，每年要去做身體檢查，而嗰間診所就係指定嘅診所，馬詩慧重話本周刊話佢老公神情呆滯，佢話：「一個喺度等睇病嘅人，唔通自己笑咩。」