美股周三反彈，周四又再恢復跌勢，港股自然冇運行，噚日再跌穿大型橫行區10400底部支持，恒指收10325，跌127點，一周埋單，共跌323點，跌幅3%。
港股確認跌穿10400支持，短期如再失守10213低位，就算唔出現急挫，炒賣區亦將下移至9800至10200區域。如果美股唔止跌，杜指跌穿911事件後低位，恒指反覆下試9000機會大。
趙飛雲信技術走勢，炒輪通常一擊不中就逃跑，保留實力再出擊。近排揸正股已經好有耐性，技術開始轉壞仍力守，硬接幾棍都唔願走，周四港股尾段急升，一度以為有機守得雲開見月明，但噚日恒指再度跌穿10400，港股敗象更明顯，其實應該清貨計數，但既然之前講過新地（016）跌穿56.25元，中移動（941）跌穿21.50元才止蝕，即管撐多一陣。如果美股噚晚反彈，下周或者輸少啲。
港股後市偏淡，但對於冇貨在手嘅投資者可能係一個良機，不妨昅實恒指走勢，捕捉轉勢機會，趙飛雲見到訊號，亦即時通知讀者。
趙飛雲