七十四歲體弱多病的李伯，與患心臟病的妻子梁婆婆，晚年靠獨女阿梅供養。可是阿梅自丈夫早前失業後，帶着三名年幼在學子女經濟拮据，難再負擔父母的生活，以致李伯夫婦身陷困境，急待援手。
記者採訪當日，七十二歲的梁婆婆因頭暈不適，一直躺在床上昏睡，李伯則伴在床邊緊皺着眉，其間不時搖頭歎息。
兩老的三十七歲獨女阿梅向記者訴說﹕「阿媽以前喺鄉下耕田，好辛苦，加上本身體質唔好，所以𠵱家老咗經常唔舒服，又患有血壓高、心臟病同長期胃病，要定時食藥。阿爸就因為後生嗰陣當兵，整傷過手腳，搞到行動不便，呢幾年重患上支氣管炎，好容易咳，一轉天氣或者空氣差啲，就會咳得好犀利。」
容顏憔悴的阿梅哽咽着說：「見父母健康唔好、無精神，我個心好唔安樂。𠵱家我重無能力繼續負擔佢哋嘅生活，真係好難過！」
阿梅的丈夫，原從事裝修工作，是家中經濟支柱。惟丈夫早前失業後，一直未能覓得工作，令家庭經濟困難。「呢幾年市道唔好，我老公經常無工開，收入好唔穩定，一早已經用晒我哋啲積蓄嚟幫補每月家計。今年佢重由二月失業到𠵱家，好彩我近排搵到份工，今個月至有錢交屋租，重要畀三個仔女預繳九月份新學期嘅書簿費，𠵱家我手頭已經無乜錢剩，生活好艱難。」阿梅現任職店務員，月薪僅五千餘元。其三名子女年屆七至十一歲，暑假後將分別升讀小學二、四及五年級。
經濟緊絀，更導致阿梅的丈夫與岳父岳母關係惡化。阿梅傷心歎謂：「老公失業之後脾氣愈嚟愈差，而且經常搵我父母出氣，令佢哋好難受，我亦經常忍唔住喊！」在旁一直沉默不語，只能操潮州話但不欲回答記者問題的李伯，看見女兒淚流滿面，亦顯得一臉難過。
在香港明愛社工協助下，李伯夫婦近日獲遷新居，以排解家庭糾紛。惟兩老現欠下新居的屋租及水電按金，亦欠缺生活費。「啲按金同屋租加埋要成五千幾蚊，我邊攞到咁多錢出嚟！」阿梅憂慮地說。
負責跟進李伯夫婦個案的社工卓姑娘稱，已協助兩位長者向社會福利署申領綜援，惟尚待審批，難以解決他們眼前生活急需。
蘋果日報慈善基金了解李伯夫婦的情況後，即時撥款八千元，助兩老支付新居的水電按金、一個月屋租按金、七月份租金，以及應付短暫生活需要。
捐款編號：C0625
暖流熱線
電話：29908688
傳真：23702192
電郵：
網址：