去肯亞玩，似乎都離唔開睇動物。事實的確如是，今次介紹呢間TheArk，更加係一間專係睇動物嘅度假屋，三層式嘅簡樸建築，無金碧輝煌嘅華麗裝潢，比堅尼靚女坐喺偌大泳池旁曬太陽一幕亦欠奉，到訪住客最主要、亦係唯一嘅玩意就係睇動物，悶唔悶就真係見仁見智，不過有時靜靜哋，隔住塊大玻璃睇吓真正屬於大自然嘅產物，總比起對住香港複雜嘅人和事，來得舒服。
記者、攝影：朱維達
鳴謝：捷旅假期、阿聯酋航空
前往TheArk，路途頗遙遠，抵達首都奈羅比Nairobi，入住市中心TheStanley酒店歇一晚後，就開始北上，路經有好多間小商舖，一般三小時車程途中都會有機會落車鬆一鬆，同時睇吓當地手工藝品。
車隊（其實得兩架）會經過Thika、Nyeri，繼而到達TheAberdareCountryClub，呢間CountryClub係上TheArk嘅中途站，遊客到此必做的，包括：一、梗係居高臨下睇靚景！呢度位處山嶺，加上當日陽光煦照，萬山遍野，再配以不知多少陣清風，感覺超正！二、你可以選擇往TheArk前入住呢度嘅度假屋，48間屋前身係Farmhouse，其中第28至31號個View望得最遠（房價一樣），一間FamilyHouse每晚房價為16,000仙令（約1,597港元），你可以選擇騎馬，或可於當日即場報名參加下晝嘅GameDrive（即越野車之旅，每人1,400仙令，約140港元）。
到TheAberdareCountryClub最重要嘅事就係執拾行裝，正如之前所講，CountryClub不過為上TheArk嘅中途站，你必先要喺其中嘅ArkForestLodgeReception，辦好登記手續，繼而喺大堆行李中執一晚要換嘅衫褲鞋襪（當然最好前一晚執定），工作人員就會幫你將其餘行李放喺儲物房，待你第二日落番嚟再畀番你，因為我哋將會搭一架懷舊但「力氣」依舊嘅古老巴士上山，所以謝絕大件行李。
經過約20分鐘路程，終於抵達TheArk，不過入屋前要經過負責人一輪「訓示」，原因係我哋正身處一個無圍欄嘅郊區，隨時有野生動物出現，除咗勸我哋唔好私自離開度假屋範圍，重要保持寧靜，避免騷擾其他動物。
入到TheArk，你再唔會聽到煩擾又懶係In嘅電話鈴聲（因為所有漫遊系統都收唔到），你亦可以暫時丟低香港瑣事，靜聽大自然為你譜奏嘅樂章。所謂「大自然樂章」其實即係一啲聲都無，皆因TheArk重靜過一間圖書館，當你發出嘅聲量大到影響到出面嘅動物時，負責人就會突然喺你背後出現講"Pleasekeepquiet!"，於是整日我同班可愛團友都用「氣」溝通，認真搞嘢！
TheArk樓高三層，第二、三樓除咗客房，重有觀景臺，三樓同二樓分別係室內同室外觀景位，一樓設有酒吧、餐廳同休息間，一般遊客都會集中坐喺一樓觀景位，因為視野範圍廣闊，而且觀景間內放有梳化，侍應更不時會以熱茶咖啡糕點款待，感覺就好似坐喺跑馬地馬場嘅貴賓室一樣。
我就較鍾情落到地下一層叫PhotoHide嘅房間，設計就好似一座軍事用嘅碉堡一樣，以石屎蓋建（以防動物衝擊），留下一排排長形氣口，你可以以最近距離觀賞動物，不過唔知我好彩抑或唔好彩，其中一隻大象走近，以為向我示好，誰不知佢突然停低，放咗一陣氣（其實即係屁）之後就繼而拉下大屎一篤……嘩！真係走都走唔切！
TheArk重有一個特色，就係24小時唔停咁向你報告動物行蹤，皆因工作人員會定時將食物埋到度假屋附近泥地處，大象、水牛、小葦羚、豹就會定時定候嚟到「幫襯」。
就算你返房都唔會miss任何睇動物機會，因為當工作人員發現有動物走近，就會按動總機，每間客房床頭「鬧鐘」就會同時響起，24小時提醒你有唔同嘅動物走近，可以出嚟到觀景臺參觀。響四下就代表有豹，三下代表象，兩下代表水牛，一下代表其他動物。當然，若果唔想夜晚三點叫醒你起身，你可以關上電源，不過我建議除非你真係想24小時隨時OnCall睇動物，否則臨瞓前最好關上「鬧鐘」！雖然只係住一晚，但感覺真係好好，至少心境平靜咗好多，好耐都無試過呢種感覺……
聯絡公司：LonrhoHotelsKenya
網上登記：
電話：（254）2-216940
傳真：（254）2-216796
電郵：
房租：雙人房352美元（約2,746港元），費用已包括由AberdareCountryClub前往TheArk之巴士費。
出門提一提
簽證：持BNO、特區護照及CI者都可以於肯亞機場辦理落地簽證，費用50美金，香港並無肯亞領事館，可向英國領事館簽證部查詢有關事宜，電話：29013111。
旅行團：可參加逢星期六出發嘅東非肯亞．紅鶴湖國家公園．瑪沙瑪拉國家保護區精裝假期七天團（團號：JKC），團費：$12,998起。查詢：27350222（捷旅假期）
貨幣：HK$1約兌10.05KenyanShilling（KES）
氣溫：肯亞夜晚比想像中嚴寒，尤其喺TheArk，位處高原，剛巧又碰上落雨，夜晚氣溫會急降至約10℃。
1.度假屋不時會出現短暫性停電，第一次停電時沖緊涼，赤赤條條時真係有啲尷尬！
2.夜晚瞓覺時建議關上「鬧鐘」掣，免得嚇到心慌慌。
3.盡量用「氣」講嘢，嚴禁聲浪太大騷擾屋外動物。
4.影相時切忌用閃燈，否則可能嚇親啲動物。
5.夜晚氣溫會降至10℃，雖然有暖水袋供應，但最好帶多件風褸。
6.記得帶長鏡及望遠鏡，如果唔係就走寶啦！