賭王何鴻燊同十姑娘何婉琪兩兄妹，為咗澳門旅遊娛樂公司嘅股權交惡，十姑娘入稟澳門法院，同大佬對簿公堂，賭王搵律師搞咗好多嘢，今日終於都甩唔到身，要同十姑娘喺法院相見。
噚日下午賭王返信德中心寫字樓上班，看來精神不錯，但唔知十姑娘單嘢係咪搞到佢好頭痕，被記者問到十姑娘單官司，當堂發𤷪𤺧，「無嘢講，根本上唔想講呢個問題，十姑娘嘅嘢唔會再答」，現場見賭王嘅保鑣加上護衞十幾人，手拖手連成人鏈，保護老細離開，一向同記者關係良好嘅賭王，都好少咁樣招呼記者。
十姑娘去年想將澳娛股份轉到乖仔麥舜銘名下，兩兄妹開始交惡，在報紙展開連場罵戰，今年二月十姑娘去澳娛查數，據講俾人禁錮恐嚇，十姑娘於是向澳門法院入稟，告澳娛阻撓佢查數，共有七張入稟狀咁多。
消息講，佢七張入稟狀，包括被阻止查帳目發生的事件、霍英東賣出澳娛股權後澳娛的收益問題等等，入稟狀並同何超瓊做澳娛董事無關。而第一張入稟狀，係講二月四日十姑娘到澳娛總公司查閱資料，俾人阻撓，損害到股東利益，原本六月二十一日賭王要到法院應訊，佢透過律師延期到七月十九日，噚日佢又透過律師要求延期，理由係要去葡萄牙公幹，但法院唔接受，所以今日就要同十姑娘喺法院見。
傳真︰2623-9278
電郵︰