又係四川菜？香港通街都係啦！且慢，店主只攻川菜，不滲入他省菜式，開店前先花了半年時間到四川大小食肆，橫街窄巷取經，又派員實習，更誠邀川菜師傅，專心調配各式醬汁佐料。新店菜式絕不熟口熟面，一招甜燒白──蒸糖漿芝麻腩肉，實情是甜品一道，已夠你目瞪口呆，其他驚喜陸續有來。
記者：楊一凡攝影：陳偉強
別把這道川式甜品誤當成主菜，腩肉落入四川人手上，變得香甜軟糯，先由腩肉上下夾攻黑芝麻豆茸，然後用糯米墊底，淋滿糖漿，隔水慢火蒸熟，熱力把部份肥膏融入糯米當中，厲害「膩」害。
試味報告：
腩肉鬆軟得只要用筷子輕力一撥，一夾，就往口裏送，油膩嗎？總有些少啦，但勝在夠新鮮感滿足好奇吖。
水煮牛肉就食得多，但老闆發現很多食客都戒牛肉，他腦筋急轉彎，把鱔片加入水煮菜式當中。選用拇指咁大條的花黃鱔，貪其肉爽味鮮甜，把切段的花黃鱔跟指天椒、紅椒及辣椒乾同煮，滾出血紅川菜。
Smile試味：
鱔片很香但辣到痹，而碗底的大豆芽及粉皮，更加辣到飛起。
鐘水餃、龍抄手和擔擔麵是食店主打，水餃和抄手跟三種湯底，上湯、紅油和酸辣，可變出六個美味選擇；擔擔麵有麻醬、地道及肉醬。有辣有唔辣，一律八蚊碗。
試味報告：
龍抄手的麵皮煙韌，餡料飽滿，配紅油最好；鐘水餃清清哋，放上湯，掂晒；肉醬擔擔麵溫和，麻醬及地道兩款都帶辣。
鍋巴在四川又叫響菜，點響法？當鍋巴被突如其來的三鮮熱湯一燙，就嚇得「吱吱」作響囉。三鮮湯用鮮雞湯底煮黃鱔、雞片和牛肉片，不知幾鮮味，如果我係鍋巴，實開心到嘩嘩聲。
試味報告：
乾脆的鍋巴起勢把上湯索滿一身，所以你能同時嗒到飯焦香及鮮雞湯味。
賣相和菜名都殺氣騰騰，連老闆都話：「五步之內已感到辣氣圍攻。」咁誇？毛血旺汁用指天椒、鮮紅椒、紅泡椒、乾椒、四川香料、薑和葱以及田螺汁熬製而成，爆香後加入雞紅、豬腸和牛雜滾兩滾，熱辣出場。
試味報告：
毛血旺的辣細緻而迅速，一啖入口，舌頭和嘴唇先感到火辣，辣味會在兩秒內迅速蔓延。我以過來人的身份勸你，唔得咪死頂。辣到飛起吖！
店方自設雞場，招牌菜必選係自給自「捉」的蜀山雞，先用花椒、八角、草果及川式香料醃雞，待一小時後便可清蒸，收到柯打馬上切件，並淋秘製醬汁及紅油，秘製？以口水雞醬汁為主，再加秘方香料。
試味報告：
平凡的白切雞，加入香料及紅油後，鮮甜中帶香辣惹味。
店名：蜀山傳菜
電話：23772909
地址：佐敦白加士街56號地下
座位：60個
營業時間：上午11時半至晚上11時半
付款方法：只收現金