暑假來臨，到沙灘暢泳曬太陽可謂指定節目，若果唔想咁單調，一大班人想搞搞新意思，不妨試吓帶多部數碼相機，配埋專用防水殼，就唔怕濕水兼可以毫無顧忌咁周圍影相，除咗影低陽光與海灘嘅靚景外，重可以拍低眾人玩水實況，遊玩氣氛立時勁升！
記者、攝影：徐影龍
ImageGirl：王穎
由於傳統相機比數碼相機發展早得多，所以防水殼嘅選擇亦特別多，不過數碼攝影另有優勢，除咗機身纖巧外，重可以透過機背LCD即時預覽，水底睇都咁清晰，最正係可以一口氣拍攝大量相片。
就以最普及嘅二百萬像素相機為例，以Normal質素記錄，每張容量大概300至400KB，一張128MB記憶卡已可儲存約四百幾張相，足夠用家一日拍攝量，調轉係傳統相機換菲林都換到手軟，加上防水殼接觸過水，經常打開換菲林只會增加滲水危險，所以普通用家手持一部數碼相機加防水殼，已可開開心心咁影足一日。可惜香港水域污染嚴重，潛入三、四十米水深可視範圍都唔高，有心想影海底靚景，相信要出國旅行先有機會喇。
目前一部數碼相機賣價閒閒哋都要二、三千蚊，咁貴部機梗要好好保護喇。除咗買番同廠專用防水殼較有保證外，其實重有好多事前工夫要做。
首先喺未裝入相機前先將防水殼緊緊合上，放入洗手盆內浸三十秒，睇吓會唔會有大量氣泡冒出，有即代表防水殼扣得未夠實而滲水，之後在陽光底下觀察是否有水迹喺防水殼內，一切妥當就可裝入數碼相機。
裝機前要注意兩件事，第一係確保機內有足夠電池及記憶體，避免要臨時更換咁麻煩，第二係清潔好鏡頭及LCD。大部份防水殼都會附送兩支保護藥水，一支係防霞氣阻擋鏡頭，另一支就搽喺防水殼開合口嘅膠邊，進一步防止機殼滲水。
目前各式數碼相機專用殼功能大致一樣，普遍都係支援三、四十米嘅水深環境，亦可用齊機內所有按掣，價錢差別亦不大。若果你本身已有數碼相機就冇問題，只需揀番對應防水殼就得，不過若你連數碼相機都要一併購買嘅話，就要留意該型號有冇推出過對應防水殼，亦要清楚明白自己所需用途，只係遊玩性質的話，無謂浪費太多金錢購買太高級或太多功能嘅機種之上。
永明影音（23997451）旺角西洋菜街68號地下
JCShop（31022783）銅鑼灣時代廣場833號舖
香港佳能（23012468）