馬主N約飲下午茶，到文華ClipperLounge，與練馬師之子茶敍，講吓馬房之事。每年馬季歇暑期間，總有不少馬轉飯鑊。因為馬主贏唔到馬，梗係心思思要搵另外一個練馬師試吓，團體馬主更加容易有此傾向。團體內人多意見多，唔贏馬嘅話，經理人經常受到壓力，唔尊重「民意」唔得，故此被迫要同練馬師傾吓偈，攞番啲情報。
馬主N乘機同左丁山講，來季馬匹保險加費，本來唔止加咁少，多福保險要求馬匹「死亡險」（Mortality）保金高過百分之四，經馬主協會大力爭取之後，先至定喺百分之三點八五；此外，「喪失競賽能力」（LossofUse）險，在其他國家，保險公司根本唔受，以香港情況為例，上季馬會改例，規定一匹馬有兩次「心律不正常」嘅紀錄後，就要強迫退役，保險公司根本計唔掂呢條數，亦係經馬主協會與「多福」談判，先至定到保險費喺四點五巴仙水平。
「多福」嘅保險包銷，由滙豐集團包辦，滙豐以前嘅大班如桑達士、沙雅、沈弼、浦偉士都做過馬會主席，現在香港滙豐阿頭艾爾敦亦係馬會董事，對香港賽馬有認識、有承擔，賽馬保險生意，畀你做晒，一年都係四五千萬保險費，對大集團嚟講，濕濕碎之至。
練馬師之子話香港養馬，皮費唔輕，但競爭激烈，一季每個馬主要贏一場頭馬，根本不可能，練馬師只能竭盡所能，唔敢話保證有頭馬見面！