英國外相施仲宏噚日旋風式訪港，睇見舊宗主國外相踏足香港，香港嘅舊臣子唔知有乜感想？
其中俾親中報章批得最落力嘅「港英餘孽」陳太，七一回歸慶典當日，在外套上高調地掛上大英帝國司令勳章（CBE）及特區嘅大紫荊勳章，惹來唔少爭議。其實食兩家茶禮嘅又點止陳太一個，不過其他人好識做，𠵱家多數都已經收埋晒英廷之爵士勳章銜頭。呢類一身兼大紫荊同爵士呢兩個榮銜嘅人，八方係咁而數吓都至少有十個（見表）。
其實介紹大紫荊勳章得主嘅政府網頁，都有顯示其中一啲人嘅資料，好似利國偉、邵逸夫、方心讓等人就標明佢哋係「爵士」。不過另外一啲同樣係SirSir聲嘅人，好似誠哥同煲呔曾，就只用「先生」嘅稱呼。其實誠哥喺2000年獲英女皇封爵，當時佢已經講明會對呢個銜頭低調處理，日後唔會在自己名片和信封上印上爵士勳銜，亦唔使稱佢為「李爵士」。至於煲呔曾，原因更加明顯，唔使八方畫出腸。不過隨住時間過去，舊有嘅港英時代「爵士」將風流雲散，食兩家茶禮者相信會買少見少。
傳真︰2623-9278
電郵︰