美股回穩，港股全日升117點，收10452點，盈富基金（2800）宣告售罄，中銀香港（2388）亦截止認購，市場現只等待資金回流，後市可望造好。
市場傳出中銀暗盤價為7元，而芬佬在認購時只願出每股7.50元左右，但中銀就想定價在8元以上，若傳聞屬實，中銀上市後股價表現都唔慌會好，小股民沽貨獲利水位有限，亦即係話大量實錢會被中銀鎖住，咁都幾麻煩。
資本出版（8155）首日掛牌，收0.53元，較招股價高77%，成交不俗有成1066萬元，唔少買盤來自南華證券。此股主要經營《資本》雜誌，上市發行5064.8萬股新股，全數以每股0.30元進行配售。黑客話幾乎全部貨都落入自己友手上，當然好炒，但由於股價已扯高，幫手圍飛嘅人士隨時準備沽貨，後市表現勢必大上大落。但要留意係，《資本》都算係有名氣嘅雜誌，有可能成為被收購對象，但點都係一年半載之後嘅事。
過去兩日升得火熱嘅大凌（211），噚日喺公布業績勁蝕1.5億元後即散，跌幅達22%。呢隻怪股周三曾經由仙士股晉身毫子股，可惜守唔住。阿虎聽聞大凌其實想趁今次換主席及供股來一次徹底撥備，因此業績才有如此差，過埋今次可能會搞好盤數向股東交代，各位不妨留意吓，或者有意想不到嘅收穫。
光宇（1043）突破2元後，一直橫行，加上對手比亞迪上市在即，管理層似乎都按奈不住，即刻停牌宣布要配股集資，據聞承銷商要求折讓幅度頗大，令到光宇可能索性供股算數。此股開市後4分鐘至停牌，當時微升2.2%，報2.35元。
阿 虎