對於碧咸將接拍電影演殺手，圈中女星及市民都十分期待，但亦有人認為他欠吸引力。
宣萱 ：絕對支持呀，世界盃四年一次，踢兩、三屆都冇啦，佢天生一副明星相，佢做奸角型吖，女人鍾意壞蛋，如果有得同佢拍埋同一部電影，搵我做斟茶遞水角色都制呀！
吳文忻 ：碧咸拍戲直情好啦，我會捧場㗎，運動員嘅生涯咁短暫，拍戲反而會長啲，佢拍戲擺個樣出嚟就得㗎啦！
容祖兒 ：佢拍戲嗰陣記住早啲返屋企食飯，同埋要好好兼顧踢波，唔好令球迷失望。佢做黑幫角色就要奸啲，唔好掛住自己個靚樣，希望佢第日嚟香港發展啦！
姚樂怡 ：我會默默支持佢，但佢個樣咁忠、咁正義，我驚佢做奸角唔似。
林小姐 ：我會睇㗎，睇吓佢係咪做乜嘢都咁掂，我會鍾意佢做殺手，愈man愈好。
羅先生 ：碧咸對我冇吸引力，都唔知佢演技係點，我寧願睇佢踢波好過。