新地馬灣珀麗灣莫非唔夠電用，搞到要起風車用風力發電？
新地旗下新輝建築管理副總經理劉志遠講，住宅用風車發電都可算係香港首創，既可貫徹該盤環保理念，又可向小主人灌輸環保意識。
蘭西當堂好興奮，以為整個珀麗灣都係用風力發電，但細問之下，原來只有三座風車，只係畀一般耗電量小嘅設備用，好似園林燈飾同自動灑水系統等，產生嘅電力只夠點着三百盞園林燈。呢個發電系統有儲電功能，就算無風，都唔會影響園林設施的運作，當然重有後備電啦！
一提起風車，大家都諗住係荷蘭式，相當正。打探之下先知係類似美國沙漠用嗰隻，好有cyberfeel。
另外，新地代理副總經理陳秀賢噚日透露，新地喺好多年前用五千幾萬，「唔覺意」買咗竹篙灣北面一幅連沙灘土地，總面積約二十萬方呎。沙灘長四百幾呎，命名「藍鯨灣」，係珀麗灣專用嘅私家海灘。住戶可租用「藍鯨號」遊艇到此開party、BBQ、打野戰同野外活動喎。但假如政府要填海起十號貨櫃碼頭，個沙灘就會冇咗嘞。
其實面積達九十公頃嘅馬灣，都有唔少自然生態值得欣賞，新地用咗唔夠5%地方嚟起樓，另十公頃地會起三個唔同主題嘅公園，包括自然生態、糅合古今嘅地道村落同挪亞方舟。
蘭西周日去尖沙嘴行街，喺彌敦道見到一幅巨形海報，十分搶眼，係推介長實嘅港景峯，好奇心起，向長實八吓點解。佢哋好無奈咁講，長實原本租咗隔籬個寫字樓單位，做大角嘴凱帆軒嘅示範單位，租約重包埋呢個廣告位，到時就夠晒氣勢。點知人算不如天算，凱帆軒遲遲都唔賣得，既然係咁，公司就諗住唔好嘥，掛港景峯嘅海報上去。不過，第日凱帆軒開賣時，就會換畫。
呢個廣告位有幾大？十八乘二十五呎。但問到租金，佢哋就唔肯透露。
其實，長實喺隔籬喜來登酒店，都有一個廣告位宣傳集團嘅樓盤，但就冇呢個咁大咁矚目。長實嘅宣傳攻勢真係無孔不入，想唔記得佢哋都幾難。究竟呢條橋邊個諗出嚟，係咪出自趙國雄手筆呢？
失業率係咁升，長工都難搵，莫講暑期工。但利嘉閣今年竟請暑期工，重一次過請咗差唔多十個，由於呢班暑期工冇代理牌，所以唔可以做有關代理嘅工作，只能做後勤，包括市場推廣、電腦部、行政部等。月薪四千到五千蚊，喺𠵱家咁嘅環境都算唔錯。
由於利記啱啱要搬，裝箱數目有千箱，呢班新仔自然要幫手啦，逐箱貼label，都係一種新體驗。公司嘅電腦會在今日下晝6點裝箱，咁記者點攞料，佢哋話會做定啲報告，況且仍可以電話聯絡，一定有第一手資料。
美元弱勢原本有利吸引外資到香港發展，帶動地產業，但新地竟然變成受害者。話說一家名牌代理商，睇中中環國際金融中心二期商場幾個舖位，用作銷售旗下多個品牌，租用樓面唔細。單交易幾乎簽約落實，點知近排美元弱勢持續，引致股海波動，個客因經歷過97金融風暴，市場有乜風吹草動，都特別緊張，思前想後都做唔到決定。新地為咗留住佢，畀多幾個舖位組合佢揀，有大有細。國金二期商場廣達一百萬方呎，係新地下半年將招租的三個大商場之一，平均呎租一百蚊。假如新地就咁失咗個大客，就真係喊得一句句。
蘭西
電郵地址：